हुतात्मा अंभोरेंना परभणीकरांचा भावपूर्ण निरोप

परभणी :दोन दिवसांपूर्वी जम्मू काश्मीर खोऱ्यात हिमस्खलन झालं होतं. त्यात हुतात्मा झालेले परभणीचे जवान बालाजी अंभोरे यांना त्यांच्या ताडकळस या मूळ गावी शासकीय इतमामात अखेरचा निरोप देण्यात आला. तत्पूर्वी सकाळी त्यांचा मृतदेह विमानाने औरंगाबाद आणि नंतर वाहनातून ताडकळसला आणण्यात आला. गावातील जिल्हा परिषद शाळेत काही काळ गावच्या सुपुत्राचा मृतदेह अंत्यदर्शनासाठी ठेवण्यात आला होता. अत्यंत शोकाकुल वातावरणात हजारो नागरिकांनी त्यांचे अंतिम दर्शन घेतले. बालाजी अंभोरे अमर रहे अशा घोषणांनी या वेळी परिसर दणाणून गेला. नंतर लष्कर आणि पोलिसांनी हवेत बंदुकीच्या फैरी झाडून अंबुरे यांना मानवंदना दिली आणि मग अंत्यसंस्कार करण्यात आले. अंबुरे यांच्या पश्चात वडील, आई पत्नी व एक लहान भाऊ असा परिवार आहे.