प्रबोधनकारांच्या ग्रंथ प्रकाशनाला राज ठाकरेंनाही बोलवा! आशिष शेलारांची मुख्यमंत्र्यांकडे मागणी

‘प्रबोधनमधील प्रबोधनकार’ या ग्रंथाच्या प्रकाशनावरून नाराजीनाट्य रंगण्याची शक्यता आहे. कारण, आता भाजपने ह्यात उडी घेतली आहे. भाजप आमदार आशिष शेलार यांनी मुख्यमंत्री उद्धव ठाकरे यांना पत्र लिहिलं आहे. “या कार्यक्रमाला प्रबोधनकारांच्या विचारांचा व्यासंग आणि वारसा असणाऱ्या राज ठाकरे यांना देखील आमंत्रण देऊन एक चांगला संदेश देता आला असता”, असं आशिष शेलार यांनी आपल्या पत्रात म्हटलं आहे. त्याचसोबत, “विरोधी पक्षनेत्यांनाही या कार्यक्रमाला बोलावलं असतं तर अधिक आनंद झाला असता”, असा टोलाही आशिष शेलार यांनी लगावला आहे.

आशिष शेलार यांनी यावेळी मनसे अध्यक्ष राज ठाकरे यांचं कौतुक केलं आहे. “मी ज्या ज्या वेळी राज ठाकरेंना भेटतो त्या त्या वेळी प्रबोधनकारांचे ज्याज्वल्य विचार त्यांच्या तोंडून ऐकतो. त्यामुळे, राज यांना आताही या कार्यक्रमाचं निमंत्रण देता येईल. राज ठाकरे जर या व्यासपीठावर आले तर एक अत्यंत संस्मरणीय सोहळा महाराष्ट्राला पाहता येईल”, असं आशिष शेलार यांनी म्हटलं आहे. त्याचसोबत, विरोधी पक्षनेत्यांच्या आमंत्रणाचाही मुद्दा त्यांनी उपस्थित केला. यावेळी, ‘प्रबोधनमधील प्रबोधनकार’ या ग्रंथाबद्दल शेलारांनी सरकारचं अभिनंदनही केलं आहे.

दि.16 आक्टोबरला शासनातर्फे होणाऱ्या "प्रबोधनमधील प्रबोधनकार" या ग्रंथ प्रकाशनाच्या कार्यक्रमात प्रबोधनकारांच्या कुटुंबातील सदस्यांचा राजशिष्टाचार नुसार सन्मान करण्याबाबतची नम्र विनंती मा.मुख्यमंत्री उध्दवजी ठाकरे यांना पत्राव्दारे केली! @BJP4Maharashtra @Dev_Fadnavis @ChDadaPatil pic.twitter.com/8JMDd1Xbqe

— Adv. Ashish Shelar – ॲड. आशिष शेलार (@ShelarAshish) October 15, 2021

‘प्रबोधनमधील प्रबोधनकार’ ग्रंथाचं उद्या लोकार्पण

‘प्रबोधनमधील प्रबोधनकार’ या ग्रंथाचं प्रकाशन आणि शिवसेनाप्रमुख बाळासाहेब ठाकरे स्मारकाच्या संकेतस्थळाचं लोकार्पण उद्या म्हणजेच १६ ऑक्टोबरला होत असल्याचं राज्य सरकारकडून जाहीर करण्यात आलं आहे.याच कार्यक्रमाच्या, आमंत्रणावरून आशिष शेलारांनी अनेक प्रश्न उपस्थित केले आहेत. शेलार यांनी याबाबतचं ट्विट केलं आहे.