मुंबई | सव्वाशे वर्षांहून अधिक वर्षाची परंपरा असलेल्या मुंबईतील डब्बेवाल्यांच्या संघटनेत फूट पडण्याची चिन्हे आहेत. त्यामुळे या विरोधात काही डबेवालेच पुढे आले असून त्यांनी ही फूट पाडणाऱ्यांविरोधात आवाज उठवायला सुरुवात केली आहे. डबेवाल्यांचे प्रवक्ते म्हणून मिरवणारे सुभाष तळेकर यांनी हे फुट पाडण्याचे काम सुरू केले असून डबेवाल्यांच्या नावे त्यांनी लाखो रुपये लाटल्याचा आरोपही डबेवाल्यांनी तळेकरांवर केला आहे.
मुंबईत डबे पोहचवण्याचे काम करणाऱ्या या डब्बेवाल्यांना तब्बल १२९ वर्षांची परंपरा आहे. मागील १२९ वर्ष डबेवाले मुंबईकरांची सेवा करतायत. त्याचबरोबर डब्बेवाल्यांची ऐकीही मागील १२९ वर्ष टिकून आहे. ‘मॅनेजमेंट गुरू’ अशी ओळख असणारे मुंबईचे डबेवाले आता टेक्नोसॅव्ही झाले असून त्यांनी आता ऑनलाइन सेवा सुरू केली आहे. त्याच बरोबर ते कुरियर सेवा देखील देणार आहे.
पण, सुभाष तळेकर यांना मुंबई डबेवाल्यांचे प्रवक्ते या पदावरुन दूर करण्यात आले असून फसवणूकीप्रकरणी तळेकर यांच्या विरोधात शिवाजी पार्क पोलीस ठाण्यात फौजदारी गुन्हाही दाखल करण्यात आला आहे. बडतर्फ करण्यात आले असतानाही तळेकर डबेवाल्यांच्या नावाने वेगवेगळे कार्यक्रम व खोट्या बातम्या पसरवून डबेवाला मंडळाची फसवणूक करत आहेत. मंडळाचे सचिव असल्याचे भासवून मंडळाचे अध्यक्ष व इतर कार्यकारणी सदस्यांची परवानगी न घेता डबेवाल्यांच्या नावाचा गैरवापर करीत आहेत. बातम्यांमार्फत स्वतःची प्रसिद्धी करीत आहेत. डबेवाल्यांच्या नावाचा गैरवापर करुन स्वत:च्या आर्थिक फायद्यासाठी व प्रसिद्धीसाठी खोट्या बातम्या देऊन संघटनेची फसवणूक करत आहेत, असे आरोप तळेकर यांच्यावर करण्यात आले.
ज्या डबेवाल्यांच्या मॅनेजमेंटचे कौतुक जगभर होते, त्याच डबेवाल्यांमध्ये सुरू असलेल्या या सर्व प्रकरणाची डबेवाल्यांनी मुख्यमंत्र्यांसह सर्व पक्षाचे प्रमुख नेते, पोलीस अधिकारी यांच्याकडे तक्रार केली आहे. तसेच सुभाष तळेकर यांच्याकड़ून येणाऱ्या बातम्यांची दखल माध्यमांनी घेऊ नये असे आवाहनही या डबेवाल्यांनी केले आहे. डबेवाल्यांमध्ये पडलेली ही फुट मिटवण्यासाठी अंतर्गत समझोता करण्याचाही काही डबेवाले प्रयत्न करत आहेत.
तळेकरांवर काय आहेत नेमके आरोप –
– डबेवाल्यांच्या संस्थेच्या घटनेत प्रवक्तेपदाची तरतुदच नाही
– सुभाष तळेकर यांनी बेकायदेशीरपणे स्वतःला प्रवक्ते केले
– काही डबेवाल्यांना हाताशी धरून त्यांनी ही बेकायदेशीरबाब केली आहे
– स्वतः सुभाष तळेकर यांनी कधीच डबे वाहिले नाहीत
– तळेकरांनी डबेवाल्यांची बेकायदशीररित्या बेवसाईट सुरू केली
– या वेबसाईटवर संस्थेचा पत्ता आणि नंबर न देता स्वतःचा घरचा पत्ता आणि नंबर दिले
– संस्थेचे लटरहेड छापून त्यावरही घरचा पत्ता आणि स्वतःचे नंबर दिले
– डबेवाल्यांच्या नावावर मॅनेजमेंटची व्याख्याने दिली
– त्यातून येणारे पैसे स्वतः लाटले, संस्थेला एकही पैसा दिला नाही
– डब्यांवरील जाहीरातीचे पैसेही तळेकरांनी लाटले
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
