नीरव मोदींच्या मालमत्तांवर टाच, २० ठिकाणी छापे

मुंबई – सुमारे अकरा हजार ३६० कोटी रुपयांच्या गैरव्यवहार प्रकरणी परदेशात फरार झालेल्या डायमंड किंग नीरव मोदींच्या अनेक मालमत्तावर सलग दुसऱ्या दिवशी जप्तीची कारवाई करण्यात आली. सीबीआयने गीतांजली ग्रुपच्या मेहुल चोक्सीच्या विरोधात पंजाब नॅशनल बँकेच्या तक्रारीवरुन गुन्हा दाखल केला आहे. सीबीआय पथकाकडून गीतांजली ग्रुप आणि कंपनीशी संबंधित देशभरातील ५ राज्यांमधील विविध शहरातील २० जागांवर छापे मारण्यात आले आहेत. हा गुन्हा १३ फेब्रुवारीला दाखल करण्यात आल्याचे सीबीआय सूत्रांनी सांगितले आहे. महाराष्ट्रातील मुंबई, पुणे,गुजरातमधील सुरत, राजस्थानमधील जयपूर शहर, तेलंगाणामधील हैदराबाद आणि तामिळनाडूतील कॉईंबतुर या ठिकाणी हे छापे मारण्यात आले आहेत. गीतांजली ग्रुपच्या मेहुल चोक्सीसह कंपनीच्या इतर संचालक यांच्या घर, कार्यालय आणि कारखान्यांवर मारण्यात आले आहे.