मुंबई | घटस्थापनेला आता अवघे काहीच तास शिल्लक राहिले आहेत. सध्या आकर्षक रंगसंगतीसह हिऱ्याची सजावट केलेल्या देवींच्या मूर्तींना मोठी मागणी आहे. त्यामुळे देवीच्या मूर्तींना आभूषणे, अलंकार तसेच लखलखणाऱ्या आणि चमचमणाऱ्या हिऱ्यांनी मढविले जात आहे. नवरात्रोत्सवासाठी मुंबईतील ठिकठिकाणच्या चित्रशाळेत गेल्या सहा महिन्यांपासून मूर्ती साकारण्याचे काम सुरू आहे.
भक्तांच्या मागणीनुसार, कोंबड्यावर आरूढ झालेली आई एकविरा, वाघावर बसून आलेली भवानी माता, अंबा माता, अष्टभुजा अंबामाता, तुळजाभवानी, शप्तशृंगी मातेच्या प्रतिकृतींना मोठ्या प्रमाणात मागणी आहे. सध्या मूर्तींना रंगकाम करण्याचे काम आटोपले आहे आणि मूर्तीला हिरे, रंगीबेरंगी खडे लावण्याचे काम जोरात सुरू आहे. मूर्तींमध्ये जिवंतपणा आणण्यासाठी पूर्णपणे नैसर्गिक रंगांचा वापर केला जातो. शिवाय, वेलवेट रंगाचा वापर करून मूर्ती अधिक उठावदार केली जाते. त्याचप्रमाणे देवीची आभूषणेही हिऱ्यांनी सजविली जात आहेत. अगदी देवीच्या गळ्यातील हार, कानातील झुमके, हातातील बांगड्या, पायातील पैंजणही हिऱ्यांनी, खड्यांनी सजविले जात आहेत.
दररोज नव रंगाची साडी
नवरात्री म्हटले की नव रंगाची साडी आणि नऊ रंग हे स्त्रियांच्या दृष्टीने फार महत्वाचे असते. त्यामुळे या नऊ दिवसांत महिला त्या त्या रंगाच्या दिवशी त्या त्या रंगाच्या साड्या नेसतात. त्यावेळी देवीची त्याच रंगाच्या साडीने ओटी भरली जाते. मात्र मागच्या वर्षीपासून देवीलाही त्याच रंगाची साडी दररोज नेसविली जात आहे. यासाठी घरगुती मूर्तींमध्येही या वर्षी तीन फुटांच्या वर उंचीच्या मूर्तींची नोंदणी झाली आहे. उंच मूर्तींना दररोज त्याच रंगाची साडी नेसविता येत असल्याने अशा मूर्तींना पसंती दिली जात आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
