मुंबई | ‘सखाराम बाईंडर’, ‘कमला’, ‘रथचक्र’ अशा एकापेक्षा एक दर्जेदार नाटकांमध्ये आणि ‘सामना’, ‘हा खेळ सावल्यांचा’ सारख्या चित्रपटांमध्ये अविस्मरणीय भुमिका साकारणाऱ्या ज्येष्ठ अभिनेत्री लालन सारंग यांच्या निधनाने मराठी रंगभूमी – चित्रपट क्षेत्राची मोठी हानी झाली आहे, अशा शब्दांत सांस्कृतिक कार्यमंत्री विनोद तावडे यांनी ट्विट करून लालन सारंग यांच्या निधनाबद्दल दुःख व्यक्त करुन श्रद्धांजली वाहिली आहे.
आपल्या लक्षवेधी अभिनयाने लालन सारंग यांनी अभिनयविश्व गाजवले. मनोरंजनासोबत सामाजिक संदेश देणाऱ्या नाट्यकृतींना प्राधान्य देणाऱ्या लालनजी ८७व्या नाट्यसंमेलनाच्या अध्यक्षा होत्या. प्रयोगशील अभिनेत्री म्हणून सर्वश्रूत असणाऱ्या लालनजी यांना भावपूर्ण श्रध्दांजली!
— Vinod Tawde (@TawdeVinod) November 9, 2018
शोकसंदेशात तावडे यांनी म्हटले आहे की, विजय तेंडुलकर लिखित सखाराम बाईंडर, कमला या गाजलेल्या नाटकांमधून कमला आणि चंपा या दोन व्यक्तिरेखा अत्यंत धाडसाने साकारणाऱ्या लालन सारंग यांनी रंगभूमीवर आपल्या अभिनयाचा जबरदस्त ठसा उमटवला. त्याचबरोबर मराठी आणि हिंदी नाटकांमध्येही त्यांनी अभिनय केला आहे. मराठी चित्रपटांमध्येही त्यांनी लक्षवेधी भुमिका साकारल्या आहे. कणकवली येथे झालेल्या ८७ व्या मराठी नाट्यसंमेलनाचे अध्यक्षस्थान त्यांनी भूषवले होते. आपल्या दर्जेदार अभिनयाने मराठी रंगभूमीला समृद्ध करणाऱ्या लालन सारंग यांच्या निधनामुळे रंगभूमीने अष्टपैलू व्यक्तिमत्व गमावले आहे, असेही तावडे यांनी शेवटी म्हटले आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
