मुंबई – कमला मिल कम्पाऊंडमधील ‘वन अबव्ह’ व ‘मोजोस बिस्ट्रो’ या दोन रेस्टो पबला आग लागून त्यात १४ निष्पाप लोकांचा मृत्यू झाला. ‘हुक्का पार्लर’मुळे ही आग लागल्याचे प्राथमिक तपासात निष्पन्न झाले होते. त्यानंतर महाराष्ट्र स्वाभिमान पक्षाच्या वतीने ‘हुक्का पार्लर’ हटाव या मागणीसाठी मुंबई महापालिकेचे आयुक्त अजोय मेहता यांच्या कार्यालयावर मोर्चाचे १५ जानेवारी रोजी मोर्चाचे आयोजन केले होते. मात्र महापालिकेने हुक्का पार्लर विरोधात कारवाई सुरू केल्यामुळे तूर्तास हा मोर्चा पुढे ढकलण्यात येत असल्याची घोषणा आमदार नितेश राणे यांनी एका प्रसिद्धी पत्रकाद्वारे केली आहे.
‘कमला मिल कम्पाऊंड’मध्ये आग लागली त्याच दिवशी आमदार नितेश राणे यांनी या आगीमागे ‘हुक्का पार्लर’ असावे, अशी शक्यता वर्तविली होती. पुढे झालेल्या तपासात त्याला पुष्टी मिळाली. ‘हुक्का पार्लर’मुळे १४ जणांना प्राण गमवावा लागला. या घटनेने अस्वस्थ झालेले आमदार हितेश राणे यांनी मुंबईतील सर्व ‘हुक्का पार्लर’ बंद करावेत या मागणीसाठी मुंबई महापालिकेवर महामोर्चाची घोषणा केली होती. या मोर्चाची तयारीही महाराष्ट्र स्वाभिमान पक्षाच्या वतीने करण्यात आली होती. ‘हुक्का पार्लर’बाबतचे गांभिर्य महापालिका आयुक्त आणि प्रशासनाच्या निदर्शनास आणून देण्यासाठी महाराष्ट्र स्वाभिमान पक्षाच्या वतीने १० ते १२ जानेवारी दरम्यान सह्यांची मोहीम घेण्यात आली.
दरम्यान, या मोर्चाच्या घोषणेची आणि सह्यांच्या मोहिमेची दखल घेऊन मुंबई महापालिकेच्या वतीने ‘हुक्का पार्लर’ आणि हॉटेलमधील अन्धिकृत बांधकामाविरोधात कारवाई सुरू करण्यात आली आहे. पोलीस प्रशासनानेही या प्रकरणातील गुन्हेगारांवर धडक कारवाई सुरू केली आहे. म्हणून तुर्तास हा मोर्चा पुढे ढकलण्यात येत असल्याची घोषणा आमदार नितेश राणे यांनी एका प्रसिद्धी पत्रकाद्वारे केली आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
