मुंबई | देशभरात आज दसऱ्याची धुमधाम पाहायला मिळणार आहे. तर महाराष्ट्रासाठी आजचा दसऱ्याचा दिवस हा अत्यंत महत्वाचा असणार आहे. कारण राज्यात शिवसेना पक्षप्रमुख उद्धव ठाकरे (Uddhav Thackeray) आणि राज्याचे मुख्यमंत्री एकनाथ शिंदे (CM Eknath Shinde) यांचा दसरा मेळवा (dussehra melava) होणार आहे. या मेळव्यात शिंदे गट आणि ठाकरे गट या दोघांमध्ये सभेच्या गर्दीची स्पर्धा पाहायला मिळणार आहे. ठाकरे गटाचा दसरा मेळवा शिवाजी पार्कवर तर शिंदे गटाचा बीकेसी मैदानावर होणार आहे. या दोन्ही गटाकडून आज (5 ऑक्टोबर) होणाऱ्या दसरा मेळव्यासाठी जोरदार शक्तीप्रदर्शन होणार आहे. आजच्या दसरा मेळाव्यात ठाकरे आणि शिंदे कोण बाजी मारणार याकडे सर्वांचे लक्ष लागले आहे.
शिंदे गटाने बीकेसीवर होणाऱ्या मेळाव्यात त्यांच्या समर्थक आणि कार्यकर्त्यांसाठी आमदार प्रताप सरनाईक यांनी तब्बल दोन ते अडीच लाख फुड पॅकेटसची ऑर्डर दिली आहे. शिंदे गटाने ठाण्यातील प्रशांत कॉर्नर या मिठाईच्या दुकानाला ही ऑर्डर देण्यात आली आहे. या फूड पॅकेट्समध्ये धपाटे, ठेपला, कचोरी, गुलाबजाम असे चविष्ट पदार्थ असणार आहेत. प्रत्येक शिवसैनिकाला बीकेसी मैदानावर मेळावा संपल्यानंतर हे फूड पॅकेट्स दिले जाणार आहेत.