कोरोनाच्या नव्या स्ट्रेनचे आणखी ३ रुग्ण महाराष्ट्रात आढळले

पुणे | कोरोनाच्या नव्या प्रकाराचा संसर्ग झालेले आणखी ३ पॉझिटीव्ह रुग्ण महाराष्ट्रात असल्याचं आढळून आले आहे. राज्याचे आरोग्यमंत्री राजेश टोपे यांनीच ट्विट करत यासंदर्भातील माहिती दिली. हे तिन्ही प्रवासी रुग्ण पिंपरी – चिंचवडचे असल्याची माहितीही त्यांनी दिली. त्यामुळं आता पिंपरी- चिंचवड भागात दहशतीचं वातावरण पाहायला मिळत आहे.

दरम्यान, आतापर्यंत राज्यात ब्रिटनमधील कोरोना व्हायरच्या नव्या प्रकाराचा संसर्ग झालेल्यांची रुग्णसंख्या ११वर पोहोचली असतानाच त्यातील २ रुग्णांना रुग्णालयातून रजा देण्यात आली आहे. यामध्ये मुंबई आणि पुण्यातील प्रत्येकी एका रुग्णाचा समावेश आहे. पीटीआय या वृत्तसंस्थेच्या माहितीनुसार नव्या स्ट्रेनच्या कोरोनाचा संसर्ग झालेले ११ रुग्ण हे असिम्प्टमॅटिक आहेत. अर्थात या रुग्णंमध्ये कोरोनाची लक्षणं आढळून आलेली नाहीत.

ब्रिटनमधील नवीन कोरोना स्ट्रेनचे राज्यात आणखी 3 प्रवाशी आढळले. तिनही प्रवाशी पिंपरी चिंचवडचे असून नव्या कोरोना स्ट्रेनचे राज्यात आता एकूण 11 प्रवाशी झाले आहेत.

— Rajesh Tope (@rajeshtope11) January 7, 2021

आंतरराष्ट्रीय प्रवास करुन आलेल्या प्रवाशांच्या चाचण्यांना राज्यात वेग….

महाराष्ट्रात आतापर्यंत आंतरराष्ट्रीय प्रवास करुन आलेल्या जवळपास ४८५८ प्रवाशांची कोरोना चाचणी करण्यात आली आहे. युकेमध्ये कोरोनाच्या नव्या स्ट्रेनची दहशत पसरलेली असतानाच सावधगिरी म्हणून राज्यात हे पाऊल उचलण्यात आलं आहे. या प्रवाशांपैकी १२११ जणांना आतापर्यंत त्यांनी अत्यावश्यक अशा संस्तात्मक विलगीकरणाचा कालावधी पूर्ण केला आहे.

राज्यात कोरोना लसीच्या ड्राय रनची लगबग

केंद्र सरकारच्या मार्गदर्शक सूचनांनुसार आज (८ जानेवारी) महाराष्ट्रातील ३० जिल्हे आणि २५ महापालिका क्षेत्रांमध्ये आज कोरोना लसीकरणाचं ड्राय रन केलं जाणार आहे. आरोग्यमंत्री राजेश टोपे यांच्या माहितीनुसार प्रत्येक जिल्ह्यातील तीन आरोग्य केंद्र आणि मनपातील एका आरोग्य केंद्रावर ड्राय रन केलं जाईल. यापूर्वी २ जानेवारीला पुणे, नंदुरबार, जालन आणि नागपूर जिल्ह्यासह नागपूर मनपा आणि पिंपरी चिंचवड महापालिकांमध्ये ड्राय रन करण्यात आलं होतं.