तामिळनाडूमध्ये पुन्हा राजकीय पेच

चेन्नई- तामिळनाडूमध्ये अण्णा द्रमुकच्या दोन गटांचे काल मनोमिलन होताच आज या पक्षात मोठी फूट पडल्याचे चित्र पाहवयास मिळाले. मंगळवारी सकाळी अण्णा द्रमुकचे उप महासचिव टीटीव्ही दिनकरन यांच्या समर्थकांनी बंडखोरी केल्याने तामिळनाडूच्या राजकारणात नवा ट्विस्ट आला आहे. आज सकाळी या १९ बंडखोर आमदारांनी टीटीव्ही दिनकरन यांच्या निवासस्थानी जाऊन त्यांची भेट घेतली. यानंतर काही वेळातच ते राजभवनात पोहचले. यावेळी त्यांनी राज्यपाल सी. विद्यासागर राव यांची भेट घेऊन सरकारचा पाठिंबा काढून घेत असल्याचे जाहीर केले. यामुळे तामिळनाडूमध्ये पुन्हा राजकीय संघर्ष पाहवयास मिळत आहे