नागपूर | राष्ट्रीय स्वयंसेवक संघाकडे बेकायदेशीर शस्त्रसाठा असल्याचा गंभीर आरोप ११ आॅक्टोबर रोजी भारिप बहुजन महासंघाचे अध्यक्ष अ‍ॅड. प्रकाश आंबेडकर यांनी केला होता. त्यामुळे संघ या दसऱ्याला शस्त्रपूजा करणार का याकडे सर्वांचे लक्ष लागून राहिले होते. परंतु संघाच्या पदाधिकाऱ्यांनी परंपरेनुसार दसऱ्याला शस्त्रपूजन करणारच असल्याचे ठामपणे सांगितले आहे. “स्वयंसेवक संघाकडे असलेला बेकायदेशीर शस्त्रसाठा जप्त करावा. पोलिसांनी हा शस्त्रसाठा जप्त न केल्यास आम्ही न्यायालयात जाऊ”, असा इशारा प्रकाश आंबेडकर यांनी दिला होता.

विजयादशमीला अवघा एक दिवस राहिलेला असताना प्रकाश आंबेडकर यांनी हा मुद्दा पुन्हा एकदा उचलून धरला आहे. “विजयादशमीला राष्ट्रीय स्वयंसेवक संघाकडून करण्यात येणाऱ्या शस्त्रपूजेवर आमचा आक्षेप नाही. परंतु संघाकडे असलेली ही शस्त्रे नेमकी कोणाची आहेत तसेच या शस्त्रांचा परवाना आहे का ?”, असा प्रश्न प्रकाश आंबेडकर यांनी यावेळी उपस्थित केला आहे.

दरम्यान, प्रकाश आंबेडकर यांच्या आरोपांकडे दुर्लक्ष करीत ” भारतीय संस्कृतीत विजयादशमीच्या दिवशी शस्त्र किंवा उपकरणांची पूजा करण्याला मोठे महत्त्व आहे. ही भारतीय परंपरा आहे. त्यामुळे विजयादशमीच्या उत्सवातही शस्त्रपूजन होणारच,'” असे नागपूर येथील संघाच्या पदाधिकाऱ्यांनी स्पष्टपणे सांगितले आहे.