गौरी टिळेकर | गानसम्राज्ञी लता मंगेशकर यांनी आयुष्यात सर्व काही कमावले. लतादीदींच्या स्वरांनी जग जिंकले. त्यांच्याकडे नाव-लौकिक, सन्मान, आदर, धनसंपत्ती असे सर्व काही आहे. माध्यमांकडून लतादीदींना कायमच त्यांच्या वैयक्तिक आयुष्याबद्दल काही ठराविक प्रश्न विचारले गेले. त्यापैकी एक म्हणजे “लतादीदी, तुम्ही लग्न का केले नाही?” लतादीदींवर त्यांच्या सर्व भावंडांची जबाबदारी होती. म्हणूनच त्यांनी कधी वैयक्तिक सुखाचा विचार केला नाही. त्यांच्यापुढे कामाचा व्याप मोठा होता त्यामुळे त्यांनी स्वतःच्या लग्नाचा विचार केला नाही. पण यासोबतच आणखी एक कारण आहे की ज्यामुळे लतादीदींनी आयुष्यभर लग्न केले नाही.
असे म्हणतात की, डुंगरपूर राजघराण्याचे महाराज राज सिंह यांच्यावर लतादीदींचे प्रेम होते. हृदयनाथ मंगेशकर आणि महाराज राज सिंह हे एकमेकांचे चांगले मित्र होते. राज हे कायदेविषयक शिक्षण घेण्यासाठी मुंबईत आले तेव्हा त्यांची मैत्री झाली. ते एकत्र क्रिकेट खेळत असत. पुढे त्यानिमित्ताने हृदयनाथ मंगेशकर यांच्या घरी राज यांचे येणे जाणे होत असते. त्यामुळे लतादीदी आणि राज यांची मैत्री झाली. आणि पुढे या मैत्रीचे प्रेमात रूपांतर झाले. एव्हाना लतादीदींच्या गाण्यांमुळे त्या सर्वपरिचित झालेल्या होत्या. त्यामुळे माध्यमांनीदेखील त्यांना याबद्दल प्रश्न विचारायला सुरुवात केली होती.
असे म्हटले जाते की, राज आणि लतादीदी या दोघांनाही एकमेकांशी लग्न करायचे होते. परंतु हे लग्न कधीही होऊ शकले नाही. कारण राज यांनी त्यांच्या आई-वडिलांना असे वचन दिले होते की, ‘ते कोणत्याही सामान्य कुटुंबातल्या मुलीशी लग्न करणार नाहीत.’ पुढे लतादिदींप्रमाणेच राज यांनीदेखील लग्न केले नाही. ते अविवाहितच राहिले.
राजसिंह यांना क्रिकेटची प्रचंड आवड होती. पुढे त्यांचे बीबीसीआय सोबत देखील संबंध आले. लतादीदींना देखील क्रिकेटची प्रचंड आवड आहे. असे म्हटले जाते की, राज यांच्या खिशात एक छोटा टेपरेकॉर्डर कायम असे आणि त्यात केवळ लतादीदींची काही निवडक गाणी असत. राजसिंह यांनी आपल्या आई-वडिलांना दिलेल्या वचनामुळे लतादीदींशी लग्न करता आले नाही, असे म्हटले जात असले तरी लतादीदींनी कधीही याविषयावर कोणतेही भाष्य केलेले नाही.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
