राष्ट्रवादी काँग्रेसचे अध्यक्ष सचिन अहिर यांचा सवाल
मुंबई – शिवसेनेच्या पन्नास वर्षातील २५ वर्षे युतीत सडली हे कळायला इतका उशिर का लागला, असा सवाल राष्ट्रवादी काँग्रेसचे अध्यक्ष सचिन अहिर यांनी शिवसेनेला केला आहे. त्यामुळे आता युतीत आणखी जास्त काळ सडण्याऐवजी राज्य आणि केंद्र सरकारमधूनही बाहेर पडा, असा खोचक सल्लाही अहिर यांनी शिवसेनेला दिला आहे.
आगामी महापालिका निवडणुकांमध्ये आणि भविष्यातील कोणत्याही निवडणुकीत यापुढे स्वबळावर लढण्याची घोषणा गुरूवारी शिवसेना पक्षप्रमुख उद्धव ठाकरेंनी केली.त्यावर प्रतिक्रिया व्यक्त करताना अहिर यांनी काही सवाल उपस्थित केले.उद्धवजी म्हणतात की, त्यांच्या पक्षाची २५ वर्षे युतीत सडली, तर मग दुर्गंधी सुटेपर्यंत युतीतून बाहेर पडायचे ते का थांबले होते. आणि जर युतीतून बाहेर पडायचेच होते, तर महापालिका जागावाटपांच्या चर्चेचे नाटक तरी का केले. कुठेतरी आपल्याला हवी ती गोष्ट मिळत नाही, म्हणून आपल्याला ती गोष्टच आवडत नाही, असे म्हणण्याचा हा प्रकार असल्याचे सांगत, शिवसेनेने आता आपल्या राजकारणासाठी मुंबईकरांना गृहीत धरणे सोडून द्यावे, असा सल्ला त्यांनी दिला.
ते पुढे असे म्हणाले की, कालच्या आपल्या भाषणात उद्धव यांनी असा उल्लेख केला की, मुंबईतल्या अमराठी भागातले प्रभाग आम्ही युतीत भाजपला दिले होते. आणि मराठीबहुल भाग आम्ही घेतले होते. याचा अर्थ अमराठी राहात असलेल्या भागांबद्दल शिवसेनेला ममत्व नाही का? अमराठी राहात असलेल्या भागांचाही विकास व्हावा,असे सेनेला वाटत नाही का, असा सवाल करत अहिर यांनी आपल्या या वक्तव्यावर शिवसेनेने अधिक खुलासा करण्याची मागणी केली आहे. तसेच युती तुटली तरीही दोन्ही पक्षांचे संकुचित राजकारण मात्र पुढेही चालूच राहाणार आहे, ही बाब आगामी मतदानात मुंबईकर चांगलेच लक्षात ठेवतील, असा टोलाही त्यांनी लगावला
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
