मुंबई : देशाच्या २२ राज्यातील शेतकऱ्यांनी १० दिवसीय संप पुकारला आहे. राष्ट्रीय किसान महासंघाच्या वतीने राज्यभरातील शेतकऱ्यांनी आजपासून १० जूनपर्यंत संपावर जाण्याचा निर्णय घेतला आहे. या संपा दरम्यान बळीराजा आपला कोणताही शेत माल विक्रीसाठी काढणार नाही.
शेतकऱ्यांचे कर्जमाफी आणि शेतमालास उत्पादन खर्चासह ५० टक्के हमीभावासह विविध मागण्यांसाठी गेल्या वर्षी शेतकऱ्यांनी राज्यात संप पुकारला होता. या संदर्भात सरकारने दिलेल्या आश्वासनांची वर्षभरानंतरही पूर्तता न झाल्याने शेतकऱ्यांची फसवणूक झाली आहे.त्यामुळे शेतकऱ्यांनी सरकारला धडा शिकवण्यासाठी पुन्हा एकदा संपावर जाण्याचा निर्णय घेतला आहे.
खेड-शिवापूर टोलनाक्यावर हजारो लीटर दूध रस्त्यावर टाकून संपाला सुरुवात केली. तर पुणे-बंगलोर महामार्गावर राष्ट्रीय किसान महासंघाच्या कार्यकर्त्यांनी रात्री शेतकरी संपाचा भाग म्हणून दुधाच्या टँकरमधून दूध रसत्यावर सोडून दिले. त्यामुळे संपूर्ण रस्त्यावर दुधाची नदी वाहत असल्याचे चित्र दिसू लागले होते.
या संपात २२ राज्यातील १२८ शहरामधील महाराष्ट्रातील मुंबई, नागपूर, पुणे आणि नाशिक या शहरांचा समावेश आहे. संपाच्या काळात शेतकरी आपला शेतमाल, दूध, भाजीपाला शहरांमध्ये विक्रीस पाठविणार नाहीत. आणि कोणतीही नवीन वस्तू खरेदी देखील करणार नाहीत.
सरकारने शेतकऱ्यांच्या मागण्या तातडीने मान्य कराव्या, यासाठी राष्ट्रीय किसान महासंघ, किसान क्रांती जनआंदोलन आणि किसान एकता मंचाने आजपासून दहा दिवस शेतकरी संप पुकारला आहे, अशी माहिती जनआंदोलनाचे अॅड. कमल सावंत, प्रदीप बिलोरे, मकरंद जुनावणे आणि लक्ष्मण वंगे यांनी दिली.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
