कॉंग्रेसचे ज्येष्ठ नेते आणि माजी सहकारमंत्री विलासकाका पाटील उंडाळकर यांचे निधन 

सातारा | कॉंग्रेसचे ज्येष्ठ नेते आणि माजी सहकारमंत्री विलासकाका पाटील उंडाळकर यांचे अल्पशा आजाराने निधन झाले. विलासकाकांनी त्यांनी सलग ३५ वर्षे कराड दक्षिण विधानसभा मतदारसंघाचे प्रतिनिधित्व केले होते. आज (४ जानेवारी) दुपारी कराड तालुक्यातील उंडाळे येथे त्यांच्यावर अंत्यसंस्कार होणार आहेत. राष्ट्रवादीचे अध्यक्ष शरद पवार यांनी ट्विट करत विलासकाका पाटील उंडाळकर यांना श्रद्धांजली वाहिली आहे.

काँग्रेसचे ज्येष्ठ नेते व माजी सहकार मंत्री विलासकाका पाटील उंडाळकर यांचे निधन दुःखदायक आहे.
त्यांच्या निधनाने पश्चिम महाराष्ट्रातील सहकार क्षेत्रातील लोकाभिमुख नेतृत्व हरपले.
त्यांना भावपूर्ण श्रद्धांजली!

— Sharad Pawar (@PawarSpeaks) January 4, 2021

विलासकाकांच्या राजकीय कारकीर्दीत त्यांनी १२ वर्षे विविध खात्यांचे मंत्रिपद सांभाळून महाराष्ट्राच्या जडणघडणीला हातभार लावला. उंडाळकर यांचे सहकारी क्षेत्रातही मोठे काम आहे. राजकीय जीवनात त्यांनी अनेक सहाकरी संस्था उभारल्या. त्यांच्या जाण्याने कराड, साताऱ्यासह संपूर्ण राजकीय वर्तृळातून त्यांच्या जाण्याची हळहळ व्यक्त केली जात आहे.

काँग्रेस पक्षाचे ज्येष्ठ नेते, माजी सहकार मंत्री विलासकाका पाटील-उंडाळकर यांच्या निधनामुळे एक अत्यंत लोकप्रिय, अनुभवी व निष्ठावंत नेतृत्व काळाच्या पडद्याआड गेले आहे.
त्यांना माझी भावपूर्ण श्रद्धांजली!
आम्ही सर्व उंडाळकर कुटुंबियांच्या दु:खात सहभागी आहोत.. pic.twitter.com/NeCt6MAFT8

— Balasaheb Thorat (@bb_thorat) January 4, 2021

कोण आहेत विलासकाका उंडाळकर ?

काँग्रेसी विचारधारेशी एकनिष्ठ असलेला नेता अशी उंडाळकर यांची महाराष्ट्रभर ओळख आहे. कराड दक्षिण मतदारसंघाचे आमदार म्हणून नेतृत्व करत असताना त्यांना सहकार, दुग्धविकास, पशुसंवर्धन, मदत व पुनर्वसन खात्याच्या कॅबिनेट मंत्रिपदाची संधी मिळाली होती. या सर्व क्षेत्रात त्यांनी चांगले काम करुन महाराष्ट्राच्या जडणघडणीला हातभार लावला.

विलासकाका उंडाळकर तब्बल ७ टर्म म्हणजेच सलग ३५ वर्षे माजी मंत्री विलासकाका पाटील उंडाळकर हे कराड दक्षिणचे आमदार राहिले होते. त्यानंतर त्यांच्या विरोधात माजी मुख्यमंत्री पृथ्वीराज चव्हाण यांनी निवडणूक लढवली होती. त्यामध्ये चव्हाण विजयी होऊन ते कराड दक्षिणचे आमदार झाले होते.