मुंबई | राज्यात विधान परिषदेच्या ९ जागांसाठी येत्या २१ मे रोजी निवडणूक होणार आहे. या पार्श्वभूमीवर काल (८ मे) भाजपने विधापरिषदेच्या चार उमेदवारांची यादी जाहीर केली. यात रणजितसिंह मोहिते पाटील, गोपीचंद पडळकर, अजित गोपछडे, प्रवीण दटके या ४ उमेदवारांना भाजपकडून विधानपरिषदेची उमेदवारी देण्यात आली आहे. या यादीत भाजपने नवीन चेहऱ्यांना संधी दिली आहे. मात्र, विधानपरिषदेच्या यादीत माजी मंत्री पंकजा मुंडे यांचे नाव नसल्याने त्यांच्या कार्यकर्त्यामध्ये दुःख झाले. “वाघांनो असे रडताय काय मी आहे ना”, असे ट्वीट करत पंकजा मुंडे यांनी ट्वीट करत त्यांच्या कार्यकर्त्यांना भावनिक आवाहन केले आहे.
आईंना,ताईंना फोन करून दुःख व्यक्त करताय ठीक आहे पण वाघांनो असं रडताय काय मी आहे ना ,'तुमच्यासाठी मी आणि माझ्यासाठी तुम्ही' बस साहेबांचे आशिर्वाद आहेत दिवसभर फोन उचलले नाही कुणाकुणाला उत्तर देऊ ?या निर्णयाचा मला धक्का अजिबात बसला नाही. भाजप च्या त्या चार ही उमेदवारांना आशिर्वाद!
— Pankaja Gopinath Munde (@Pankajamunde) May 8, 2020
पंकजा मुंडेंनी ट्वीटमध्ये म्हटले, “आईंना,ताईंना फोन करून दुःख व्यक्त करताय ठीक आहे पण वाघांनो असे रडताय काय मी आहे ना ,’तुमच्यासाठी मी आणि माझ्यासाठी तुम्ही’ बस साहेबांचे आशिर्वाद आहेत दिवसभर फोन उचलले नाही कुणाकुणाला उत्तर देऊ ?या निर्णयाचा मला धक्का अजिबात बसला नाही. भाजप च्या त्या चार ही उमेदवारांना आशिर्वाद!”
भाजपकडून विधान परिषदेच्या चारही उमेदवारांविषयी माहिती
रणजितसिंह मोहिते-पाटील
रणजितसिंह मोहिते-पाटील हे माजी उपमुख्यमंत्री विजयसिंह मोहिते-पाटील यांचे पुत्र आहेत. यंदाच्या लोकसभेच्या काळात तब्बल वर्षभरापूर्वी २० मार्च २०१९ रोजी रणजितसिंह मोहिते -पाटील यांनी भाजपमध्ये प्रवेश केला. राष्ट्रवादीकडून माढा मतदारसंघातून उमेदवारी न मिळाल्याने नाराज रणजितसिंह मोहिते-पाटलांनी राष्ट्रवादीला राम राम ठोकून भाजपला साथ दिली. त्यानंतर वर्षभरात भाजपकडून रणजितसिंह मोहिते पाटलांना कोणतेच पद, कोणतीच उमेदवारी मिळाली नव्हती. आता मात्र पक्षाकडून रणजितसिंह मोहिते-पाटील यांनाविधान परिषदेची उमेदवारी देण्यात आली आहे.
गोपीचंद पडळकर
राज्याच्या विधानसभा निवडणुकीच्या काळात वंचित बहुजन आघाडीला सोडचिठ्ठी देऊन धनगर समाजाचे नेते गोपीचंद पडळकर यांनी ३० सप्टेंबर रोजी भाजपमध्ये प्रवेश केला. त्यापूर्वी २६ सप्टेंबर रोजी गोपीचंद पडळकर यांनी वंचित बहुजन आघाडीला सोडचिठ्ठी दिली होती. त्यानंतर यंदाच्या विधानसभेत पडळकर यांनी बारामती मतदारसंघातून अजित पवार यांच्या विरोधात निवडणूक लढवली. मात्र, त्यांचा पराभव झाला. त्यानंतर, आता भाजपकडून गोपीचंद पडळकर यांनाराज्याच्या विधानपरिषदेची उमेदवारी देण्यात आली आहे.
प्रवीण दटके
प्रवीण दटके हे नागपूरचे माजी महापौर आणि विद्यमान नगरसेवक आहेत. भाजप नेते प्रभाकरराव दटके यांचे ते पुत्र आहेत. प्रवीण दटके हे भारतीय जनता युवा मोर्चाचे राष्ट्रीय उपाध्यक्ष देखील आहेत. तसेच त्यांनी भारतीय जनता युवा मोर्चाचे प्रदेश सरचिटणीस म्हणून देखील काम पाहिले आहे. त्यानंतर आता पक्षाकडून प्रवीण दटके यांना विधान परिषदेची उमेदवारी देण्यात आली आहे.
अजित गोपछडे
डॉ. अजित गोपछडे हे गेली तब्बल ३० वर्षे भाजपचे निष्ठावंत कार्यकर्ते राहिले आहेत. नांदेडचे अजित गोपछडे हे सध्या भाजपच्या डॉक्टर सेलचे प्रदेशाध्यक्ष म्हणून कार्यरत आहेत. याकाळात त्यांनी महाराष्ट्रातील डॉक्टरांचे संघटन मजबूत करण्याचा प्रयत्न केला. त्याचप्रमाणे, महाराष्ट्र आरोग्य विद्यापीठाचे ते संचालकही आहेत. अत्यंत एकनिष्ठ कार्यकर्ते अशी त्यांची ओळख आहे. नुकत्याच झालेल्या लोकसभा निवडणुकीत परभणी लोकसभा मतदारसंघाचे प्रभारी म्हणून त्यांना संधी देण्यात आली होती. तर आता पक्षाकडून विधान परिषदेची संधी मिळाल्यानंतर अजित गोपछडे यांना आपल्या निष्ठेचे फळ मिळाल्याचे म्हटले जात आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
