अल्पवयीन मुलीवर अत्याचार प्रकरण दडपण्याचा आरोप, डीसीपी कार्यालयावर मोर्चा

उल्हासनगर (गौतम वाघ):

उल्हासनगर येथील शांतीनगर परिसरातील अल्पवयीन मुलीवर झालेले अत्याचार प्रकरणी आरोपीवर सुधारित ऍट्रोसिटी कायद्यानुसार कारवाई व्हावी व पीडित मुलीला पोलीस संरक्षण मिळावे आणि योग्य दिशेने तपास व्हावा या मागणीसाठी पीडित मुलीचे नातेवाईक व स्थानिक रहिवाश्यांनी डीसीपी कार्यालयावर आज क्रोध मोर्चा काढला यात मोठ्या प्रमाणात जनसमुदाय उपस्थित होते .

25 सप्टेंबर 2017 रोजी शांतीनगर परिसरात दुपारच्या सुमारास आरोपी रुपेश बांद्रे ( 26 ) या आरोपीने शेजारी राहणाऱ्या 9 वर्षीय मुलीला टीव्ही वरील कार्यक्रम दाखविण्याच्या बहाण्याने घरात बोलावले . सदर मुलगी घरात आली असता बांद्रे याने तिच्यावर अत्याचार केला. पोलिसांनी आरोपीला अटक करून त्याच्या विरुद्ध ऍट्रोसिटी( अनुसुचित जाती -जमाती अधिनियम व पोक्सो ( प्रोटेक्शन ऑफ चिलड्रेन फ्रॉम सेक्शुअल ऑफेन्स ) अनव्ये गुन्हा दाखल करण्यात आला होता . सध्या आरोपी कारागृहात आहे .

या प्रकरणी पीडित मुलीच्या नातेवाईकांनी सरकारी खर्चात पोलीस संरक्षण मागितले होते मात्र अद्याप देखील त्यांना कोणत्याही प्रकारचे संरक्षण देण्यात आलेले नाही , या प्रकरणाचा तपास सहाय्यक पोलीस आयुक्त विकास तोटावार यांच्याकडे देण्यात आला आहे मात्र त्यांनी आरोपीवर जुन्या ऍट्रोसिटी अन्वये गुन्हा दाखल केला आहे , हा गुन्हा सुधारित कायद्याअनव्ये गुन्हा

दाखल करावा , अशी मागणी केली आहे , तोटावार यांनी योग्य तो अहवाल समाज कल्याण विभाग व जिल्ह्यधिकरी यांच्याकडे न पाठविल्यामुळे पीडित मुलीला योग्य ते आर्थिक साहय्य व पुनर्वसन करण्यास अडथळा होत आहे असा आरोप भन्ते गौतमरत्न व भिख्खू संघ रिपब्लिकन नेते श्याम गायकवाड, ऍड आशिष इंगळे ऍड अमित कटारनवरे ऍड सतीश बनसोडे,आणि मोर्चात सामील झालेल्या नागरिकांनी केला .

मोर्चा मध्ये महिला व बौद्ध धर्मगुरूंची संख्या लक्षणीय होती , मोर्चाचे गांभीर्य लक्षात घेवून आज सुट्टीचा दिवस असून देखील डीसीपी अंकित गोयल हे कार्यालयात मोर्चाला संबोधित करण्यासाठी उपस्थित होते. यावेळी पीडित व तिच्या कुटुंबियाला सर्वोतोपरी मदत करण्याचे आश्वासन गोयल यांनी दिले .