नाशिक | मुख्यमंत्री देवेंद्र फडणवीस आणि पालकमंत्री गिरीश महाजन यांच्या आदेशानंतर नाशिकचे महापालिका आयुक्त तुकाराम मुंढे यांच्यावरील अविश्वासाचा ठराव नाशिक नगरसेवकांकडून मागे घेण्यात येणार असल्याची माहिती, नाशिक महापौर रंजना भानसी यांनी दिली आहे. उद्या होणाऱ्या महासभेत भाजपच्या नगरसेवकांकडून हा अविश्वास प्रस्ताव मागे घेण्यात येणार आहे.
मुख्यमंत्रांच्या मुंढेंविरोधातील अविश्वास ठराव मागे घेण्याच्या आदेशामुळे नाशिकमधील नगरसेवकांना मोठा धक्का बसला आहे. १ सप्टेंबर रोजी शनिवारी मुंढेंविरोधातील अविश्वास ठरावाबाबत बैठक होणार होती. परंतु त्याआधीच मुख्यमंत्र्यांनी अविश्वास ठराव मागे घेण्याचे आदेश दिल्याप्रमाणे आता हा प्रस्ताव मागे घेण्यात आला आहे.
अनेकदा प्रयत्न करूनही आयुक्त तुकाराम मुंढे लोकप्रतिनिधींचे ऐकत नाहीत, अशी नगरसेवकांची भावना निर्माण झाली होती. नगरसेवकांचे निधी रद्द करणे, त्रिसूत्रीच्या निकषावर नगरसेवकांची कामे नाकारणे अशा अनेक प्रकारांमुळे नाशिक नगरसेवकांचे मुंढेंविरोधी मत तयार झाले.
मुंढेंच्या तडफदार कामाची सामान्य नागरिकांकडून प्रशंसा झाली. परंतु नगरसेवक आणि सत्ताधारी पक्ष कायमच यांच्या विरोधात राहिले आहे. मात्र सामान्य जनता आणि तरुणाईमध्ये मुंढे कायम त्यांच्या कार्यतत्परता आणि प्रामाणिकपणामुळे लोकप्रिय राहिले आहेत.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
