सीमारेषावर पाकिस्तानच्या कुरापती सुरूच असून त्यांनी केलेल्या हल्ल्यात चार भारतीय जवान शहीद झाले आहेत. जम्मू-काश्मीरच्या राजौरी जिल्ह्यातील भीमबेर आणि मंझाकोट सेक्टरमध्ये ही चकमक झाली. शहीदांमध्ये एका कॅप्टनसह तीन जवानाचा समावेश आहे.

शहीद जवानांमध्ये कॅप्टन कपील कूंडू, जवान राम अवतार, जवान शुभम सिंह आणि जवान रोशन लाल यांचा समावेश आहे. तर, लांस नायक इकबाल अहमद हे यात गंभीर जखमी झाले आहेत. दरम्यान, सोमवारी सकाळी पाकिस्तानकडून पुंछ जिल्ह्यातील शाहपूर सेक्टरमध्ये गोळीबार करण्यात आला होता. यात १५ वर्षांच्या मुलीचा मृत्यू झाला. या घटनेनंतर शिवसेना खासदार संजय राउत यांनी केंद्र सरकारवर हल्लाबोल केला आहे. जगभरातून आपल्याला नामर्द समजले जाईल, असे ते म्हणाले.