गोपीनाथ गडावर पंकजांचा पराभव

बीडः गोपीनाथ मुंडे यांच्या नावाने गोपीनाथ गड असलेल्या पांगरी गावातील ग्रामपंचायतीच्या निवडणुकीत मंत्री पंकजा मुंडे यांचा धनंजय मुंडे गटाने पराभव केला आहे. ओबीसी समाजाच्या नेत्या म्हणून पंकजा मुंडे गोपीनाथ मुंडेंची जागा घेऊ शकतात, या शक्यतेला या निकालाने तडा गेला आहे.

अकरा सदस्य असणाऱ्या या ग्रामपंचायतीमध्ये धनंजय मुंडे गटाचे दहा सदस्य निवडून आले आहेत. तसेच सरपंचपदीही राष्ट्रवादीचा उमेदवार निवडून आला आहे. यापूर्वी पंकजा मुंडे आणि धनंजय मुंडे यांचे जन्मगाव असलेल्या नाथरा ग्रामपंचायत बिनविरोध झाली होती. या ठिकाणी नऊपैकी पाच सदस्य राष्ट्रवादी पुरस्कृत तर चार भाजप पुरस्कृत होते. सरपंचपदही राष्ट्रवादीच्या वाटयाला आले. त्यानंतर आता पंकजा मुंडे यांनी ज्या गावात गोपीनाथ गड उभारला त्या पांगरी गावच्या ग्रामपंचायतीवरही राष्ट्रवादीची सत्ता आली आहे. या निकालाने पंकजा यांची मतदारसंघातील पकड कमकुवत होत असल्याचे दिसून येत आहे.