पुणे | सावित्रीबाई फुले पुणे विद्यापीठाने अंतिम वर्षाच्या परीक्षेमध्ये जिहादी दहशतवादशी संबंधित प्रश्न शुक्रवारी विचारल्याने वाद निर्माण झाला आहे. जिहादी दहशतवादाचे मुख्य कारण कोणते, या प्रश्नाच्या उत्तरासाठी दिलेले पर्यायही खटकणारे असल्याने, त्यात आणखी भर पडली आहे. दरम्यान, या प्रश्नाबाबत विद्यापीठ प्रशासनाने दिलगिरी व्यक्त केली असून, प्रश्नपत्रिका तयार करणाऱ्यांकडून खुलासा मागविला आहे.
सावित्रीबाई फुले पुणे विद्यापीठाच्या अंतिम वर्षाच्या परीक्षा १२ ऑक्टोबरपासून ऑनलाइन आणि ऑफलाइन पद्धतीने सुरू आहेत. ऑनलाइन परीक्षा सुरू झाल्यापासून विद्यार्थ्यांना विषयांचे पेपर न दिसणे, सोडवून झाल्यावर सबमिट न होणे, सर्व्हर डाउन, ई-मेलवर लिंक न येणे, पेपर सोडवताना स्क्रीन ब्लँक होणे अशा तांत्रिक समस्या विद्यार्थ्यांना जाणवल्या. काही दिवसांपूर्वी ऑनलाइन परीक्षेला सुरळीत सुरुवात झाली असतानाच, विद्यापीठाकडून सामाजिक तेढ निर्माण होणारा प्रश्न विचारण्यात आल्याने वाद निर्माण झाला आहे.
विद्यापीठाच्या शुक्रवारी झालेल्या अंतिम वर्षाच्या बीकॉमच्या डिफेन्स बजेटिंगच्या ऑनलाइन परीक्षेत जिहादी दहशतवादाचे मुख्य कारण कोणते, असा प्रश्न विचारण्यात आला. या प्रश्नासाठी साम्यवादाचा प्रसार, जागतिकीकरण, शस्त्रास्त्रांचा प्रसार, इस्लामिक जहालवादाने हिंसेचा वापर केला असे उत्तरांचे पर्याय देण्यात आले होते. या प्रश्नाबाबत आणि त्याच्या पर्यायाबाबत विद्यार्थ्यांनी सोशल मीडियावर आक्षेप नोंदवला होता.
प्रश्नपत्रिकेत अनावधानाने चुकीच्या शब्दाचा उल्लेख झाल्याचे सांगून, विद्यापीठ प्रशासनातर्फे दिलगिरी व्यक्त केली. प्रश्नपत्रिका तयार करणाऱ्या समितीच्या अध्यक्षांकडून खुलासा मागविल्याचे विद्यापीठाच्या परीक्षा व मूल्यमापन विभागाने म्हटले आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
