मुंबई । दरवर्षी गणेशोत्सवासाठी मुंबईहून मोठ्या संख्येने कोकणात जाणाऱ्या चाकरमान्यासाठी एसटी महामंडळाकडून या ही वर्षी एक विशेष भेट देण्यात येणार आहे. यावर्षी गणेशोत्सवाच्या निमित्ताने एसटी महामंडळाने दोन हजार २२५ जादा बससेवांची घोषणा केली आहे.
कोकणात जाणाऱ्या गणेश भक्तांसाठी एसटीकडून ८ ते १० सप्टेंबर या काळात नेहमीच्या गाड्यांव्यतिरिक्त जादा बसेस सोडण्यात येणार आहेत. गणेशोत्सवा दरम्यान कोकणात जाणाऱ्या सर्वच रेल्वे गाड्यांची तिकिटे आधीच फुल झालेली असतात.
एसटी महामंडळ दरवर्षी प्रवाशांसाठी जादा बसची ही सुविधा पुरवितात. एसटी महामंडळाने चिपळूण, मालवण, गुहागर, दापोली, देवरुख, खेड, रत्नागिरी, सावंतवाडी, महाड यामार्गावर जादा गाड्यांची व्यवस्था केली आहे.
पुण्यातूनही सोडण्यात येतील जादा गाड्या
पुण्यातील स्वारगेट, पिंपरी-चिंचवड, पुणे स्टेशन या बस स्थानकांवरून जादा गाड्या सोडण्यात येणार असून, त्यासाठी आरक्षण करण्याची सुविधा उपलब्ध करून देण्यात आली आहे.
जास्त लोकांना विशेष सेवा
एकाच ठिकाणाहून कोकणात जाणाऱ्या 40 नागरिकांनी एकत्र मागणी केल्यास त्यांना संबंधित ठिकाणाहून जादा बस सोडण्याची व्यवस्थाही करण्यात येणार असल्याचे एसटी महामंडळाकडून सांगण्यात आले आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
