मुंबई । तब्बल दहा वर्षांपासून बंद होण्याच्या प्रतीक्षेत असलेले मुलुंड डम्पिंग ग्राऊंड सोमवारपासून शास्त्रोक्त पद्धतीने बंद होणार आहे. सोमवारपासून या डम्पिंग ग्राऊंडवर ‘बायोकल्चर’ पद्धतीने कचऱ्याचे विघटन करून खतनिर्मिती केली जाणार आहे. दररोज ६०० मेट्रिक टन कचऱ्यावर प्रक्रिया करण्यात येणार असून या प्रकल्पासाठी ५५८ कोटी रुपये खर्च केले जाणार आहेत. हा प्रकल्प सुरू झाल्यानंतर मुलुंड हे गोराईनंतर बंद होणारे मुंबईतील दुसरे डम्पिंग ग्राऊंड ठरणार आहे.
हे डम्पिंग बंद झाल्यामुळे मुलुंड व ठाण्यातील हरीओम नगर, तुकाराम नगर परिसरासह इतर भागांतील नागरिकांना दिलासा मिळणार आहे. मुंबईतील कचऱ्याचा भार उचलणाऱ्या प्रमुख डम्पिंग ग्राउंड पैकी एक असलेल्या मुलुंड डम्पिंग ग्राउंड उद्यापासून बंद होत आहेत. या डम्पिंग ग्राउंडवर दररोज जमा होणारा दीड हजार मेट्रिक टन कचरा आता कांजूरमार्ग व देवनार डम्पिंग ग्राउंडवर टाकण्यात येणार आहे. मात्र मुलुंडपाठोपाठ देवनार डम्पिंग ग्राउंडचीही क्षमता संपत आल्याने मुंबईत ऐन सणासुदीत कचरा प्रश्न पेटण्याची शक्यता आहे.
गेल्या वर्षभरात या डम्पिंग ग्राउंडमुळे स्थानिक रहिवाशांचे आरोग्य बिघडले आहे. त्यामुळे हे डम्पिंग ग्राउंड बंद करण्याची मागणी गेल्या अनेक वर्षांपासून स्थानिकांकडून होत होती. डम्पिंग परिसरातील नागरिकांनी मागील काही वर्षांत मोठी आंदोलने उभारली होती. त्यानुसार १ आॅक्टोबरपासून मुलुंड डम्पिंग ग्राउंडवर कचरा टाकणे बंद करण्यात येणार आहे. यासाठी पालिका ७३१ कोटी रुपये खर्च करणार आहेत.
गेल्या दीड वर्षापासून मुलुंड डम्पिंग ग्राउंड बंद करण्यासाठी महापालिकेला ठेकेदारच मिळत नव्हता. अखेर ठेकेदार मिळाल्याने हे डम्पिंग ग्राउंड शास्त्रोक्त पद्धतीने बंद करण्यात येणार आहे. सध्या मुलुंड डम्पिंग ग्राउंडवर दीड ते दोन हजार मेट्रिक टन कचरा टाकला जात आहे. त्यामुळे हे डम्पिंग ग्राउंड बंद झाल्यानंतर हा कचरा देवनार आणि कांजूरमार्ग येथे वळविण्यात येणार आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
