मुंबई | मालाडच्या मालवणी येथील राठोडी गावातील पोलीस गेल्या अनेक दिवसांपासून नायझेरियन तस्करांवर साध्या वेशात नजर ठेवून होते. यावेळी चुकवू फिलिप्स गॉडवीन(33), चुकावे मेका डेनियल अजाह (24) आणि मायकल ओगवन्ना कौसी (22) हे तीन नायझेरियन तरुण त्या परिसरात अंमली पदार्थांच्या तस्करीसाठी आले होते. त्यांच्यावर संशय येऊन जेव्हा पोलिसांनी त्या तिघांनाही ताब्यात घेतले तेव्हा पोलिसांना तब्बल 15 लाख २० हजार रुपये किंमतीचे 152 ग्रॅम कोकेन सापडले आहे.
हे नायझेरियन तस्कर मालाडच्या मालवणी परिसरात येणार असल्याची माहिती मालवणीचे वरिष्ठ पोलिस निरीक्षक दिपक फटांगरे यांना आधीच मिळाली होती. फोनवरून संपर्क साधून हे तस्कर अंमली पदार्थ घेण्यासाठी बोलवत असल्याचे चौकशीतून पुढे आले आहे. या आधी काही तस्करांनी कारवाईसाठी गेलेल्या पोलिसांना दगडाने ठेचून मारण्याचा प्रयत्न केला होता. त्यानंतर मुंबई पोलिसांच्या अंमली पदार्थ विभागाने या नायझेरियन तस्करांचे अटकसत्र सुरू केले आहे.
मागील पाच महिन्यांत मालवणी पोलिसांनी एकूण 11 परदेशी तस्करांना अटक केली आहे. तसेच शहरातील उचभ्रू कुटुंबातील तरुण मुले या व्यसनाला सर्वाधिक बळी पडत असल्याची माहिती मिळत आहे. या संपूर्ण प्रकरणाचा तपास मालवणी पोलिसांकडून केला जात आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
