मुंबई | विधानसभा व विधान परिषदेचे कामकाज कुठल्याही महत्वाच्या मुद्यावर चर्चा करण्याविना दिवसभरासाठी तहकूब करण्यात आले. प्रशांत परिचारक यांचे निलंबन रद्द करणे तसेच धनंजय मुंडे यांच्या कथित सीडीकांडवरून दोन्ही सभागृहात काही काळ गोंधळ झाला. त्यानंतर दोन्ही सभागृह दिवसभरासाठी तहकूब करण्यात आले.
दरम्यान, जनतेच्या हिताच्या मुद्यांना बगल देण्यासाठी सत्ताधारी पळकुटी भूमिका घेत असल्याची टीका विरोधकांनी केली. विरोधकांचा आवाज दाबण्याचा हा प्रकार सुरू असून सभागृहाबाहेर जनतेचा आवाज उठवण्यासाठी विरोधक पुन्हा रस्त्यावर उतरतील असा इशारा जयंत पाटील यांनी दिला आहे.
सोमवारी कामकाजाला सुरुवात गोंधळाने झाली. शिवसेनेने प्रशांत परिचारक यांच्या निलंबन रद्द करण्याच्या मुद्यावरून घोषणाबाजी केली. त्याला विरोधकांनी पाठिंबा दर्शवला. परंतु अर्धातासानंतर शिवसेनेने आपली भूमिका बदलली. त्यामुळे विरोधक देखील गोंधळून गेले. प्रशांत परिचारक यांच्या देशद्रोहाचा गुन्हा दाखल करण्याची मागणी शिवसेनेने केली. दरम्यान, शिवसेनेच्या या दुटप्पी भूमिकेचा विरोधकांनी चांगलाच समाचार घेतला.
सत्तेत राहून सत्ताधारी पक्षाच्या धोरणाला विरोध करण्याऐवजी शिवसेनेने सभागृहातून बाहेर पडावे, असे विधानसभेचे विरोधी पक्षनेते राधाकृष्ण विखे पाटील यांनी सांगितले. तर राज्य सरकारच्या जनतेच्या हिताच्या मुद्यांना बगल देण्यासाठी अनावश्यक मुद्दे उपस्थित करून सभागृहाचे कामकाज चालू देत नाही. त्याची भूमिका पोरकट आणि पळकुटेपणाची असल्याची टीका जयंत पाटील यांनी केली.
मागील तीन दिवस सलग सुट्या असल्याने सभागृहाचे कामकाज होऊ शकले नाही. त्यात सोमवारी कामकाज सुरू होताच अनावश्यक मुद्यावर सभागृहाचे कामकाज दिवसभरासाठी तहकूब करण्यात आल्याने सत्ताधारी विरोधकांच्या भूमिकेत वावरत असल्याचे पुन्हा एकदा स्पष्ट झाले.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
