श्रीनगर – काश्मीरमधील अतिरेकी कारवाया अद्याप कमी झालेल्या नाहीत. दोन दिवसांपूर्वीच लष्कराच्या कारवाईत अतिरेक्यांच्या एका म्होरक्याला ठार करण्यात यश आलेले असतानाच, शनिवारी सकाळी जम्मू-काश्मीरमधील सोपोर जिल्ह्यात लष्कर-ए-तोयबाचे आणखी तीन दहशतवादी आढळले. सुरक्षा यंत्रणांनी तातडीने कारवाई करीत या तिघांनाही कंठस्नान घातले आहे.
सोपोर जिल्ह्यातील अमरगड येथे जवान व दहशतवाद्यांमध्ये चकमक झाली. त्यात लष्कर-ए-तोयबाच्या तीन अतिरेक्यांचा खात्मा करण्यात आल्यानंतर त्यांच्याकडून तीन एके-47 रायफल जप्त करण्यात आल्या आहेत. तसेच या चकमकीत एक जवान जखमी झाल्याचेही वृत्त आहे. चकमकीनंतर परिसरात शोधमोहीम सुरू आहे. तसेच दहशतवाद्यांच्या खात्म्यानंतर काश्मीर खो-यात हिंसाचार उफाळू येऊ नये, म्हणून बारामुल्ला परिसरातील इंटरनेट सेवा बंद करण्यात आली आहे.
दरम्यान, शुक्रवारी जम्मू काश्मीरमधील अनंतनाग जिल्ह्यात सुरक्षा दलाचे जवान आणि दहशतवाद्यांमध्ये झालेल्या चकमकीत हिजबुल मुजाहिद्दीन संघटनेचा दहशतवादी मारला गेला. स्थानिक पोलिसांनी या वृत्ताला दुजोरा दिला.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
