मुंबई- अंत्यत वादग्रस्त ठरलेल्या झोपु योजनेसाठी बिल्डर कोणत्या थराला जावू शकतात, याचा भंडाफोड संदीप येवले या तरुणाने केला. बिल्डरांकडून मिळालेली ४० लाखांची रोकड त्याने पत्रकार व कॅमेरासमोर आणून बिल्डरला तोंडघशी पाडले. हा सर्व प्रकार गैरव्यवहार उघड करू नये, म्हणून बिल्डरांनी केल्याचे बोलले जात आहे. या प्रकरणीत अनेक बड्या अधिकारी व नेत्यांचा हात असल्याचे बोलले जात आहे. दरम्यान, बिल्डरांने आपल्याला ११ कोटी देण्याचे कबुल केले होते. त्यातील 40 लाखांची लाच दिल्याचे सामाजिक कार्यकर्ता संदीप याने पत्रकार परिषदेत जाहीर केले.

झोपडपट्टीवासीयांना पक्की घरे बांधून देण्याच्या बदल्यात बिल्डरांना प्रकल्प क्षेत्रावर वाढीव चटई क्षेत्र (एसएफआय) दिला जातो. राज्य सरकारच्या वतीने राबवण्यात येत असलेल्या मुंबईतील एसआरए योजना अत्यंत वादग्रस्त ठरलेल्या आहेत. विक्रोळी पार्कसाइट येथील हनुमाननगर येथे एसआरए प्रकल्प चालू आहे. त्यासंदर्भात संदीप येवले याने माहिती अधिकारात (आरटीआय) सर्व माहिती जमा केली. ती माहिती प्रसिद्धी माध्यमांकडे देऊ नये यासाठी बिल्डराने संदीप येवले यांना एक कोटी रुपये देण्याचे मान्य केले.