भाजपकडून सरकारी यंत्रणेचा गैरवापर

अहमदाबाद – गुजरातमधील भाजप सरकार सरकारी यंत्रणेचा गैर वापर करत असल्याचा आरोप पाटीदार समाजाचा नेता हार्दिक पटेल यांनी केला आहे. सरकारी यंत्रणेला हाताशी धरून माझावर पाळत ठेवली जात आहे. पाळत ठेवायला मी काय गुन्हेगार आहे का असा खडा सवाल त्यांनी भाजपला केला आहे. मी ज्या ज्या हॉटेलमध्ये जात आहे तीथली सीसीटीव्ही फुटेजे घेऊन त्याची पडताळणी केली जात आहे. गुजरात हे प्रजासत्ताक भारतातील नेत्यांवर पाळत ठेवणारे राज्य आहे काय?, असा सवाल ही त्यांनी केला आहे. अहमदाबाद एअरपोर्ट सर्कलच्या हॉटेलमधून बाहेर पडताच सात सेकंदात गुजरात सरकारच्या गुप्तचर विभागाने माझ्या भेटीचे सीसीटीव्ही फुटेज लिक केले. मी लोकशाही भारतात राहतो. ही जगातील सर्वात मोठी लोकशाही आहे. मी जनतेचा आवाज बुलंद करणारा नेता आहे. मी काही गुन्हेगार नाही. मला लोकांना भेटण्याचा अधिकार आहे आणि तो मला हवा आहे. गुजरात सरकार जे काही करत आहे ते योग्य नाही. त्यात सुरक्षेसाठी म्हणून आपल्यावर नजर ठेवली जात आहे तर मग सीसीटीव्ही फुटेज कसे काय सार्वजनिक केले जात आहे असेही ते म्हणाले. ही लढाई सुरूच रहाणार आहे. भाजपला मी काही प्रश्न विचारले आहे त्याची फक्त मला उत्तर हवी आहेत असेही त्यांनी स्पष्ट केले. गुजरात विधानसभेच्या तारखा आज जाहीर होतील. त्याआधीच तेथील राजकीय वातावरण चांगलेच तापलेले दिसत आहे.