गुजरात निवडणूकीमुळे राजकीय वातावरण तापलेलं असतानाच निवडणूक आयोगाने भाजपला खडसावलं आहे. गुजरातमध्ये निवडणूक प्रचारादरम्यान भाजपला ‘पप्पू’ या नावाचा वापर करण्याला निवडणूक आयोगाने आक्षेप नोंदवला आहे. निवडणूक प्रचाराशी संबधित पोस्टर, होर्डिंग, जाहिराती, बॅनर आदी साहित्यांमधून ‘पप्पू’ नाव हटवण्याचे आदेश एका पत्राद्वारे निवडणूक आयोगाने भाजपला दिले आहेत. गुजरात निवडणूक आयोगानुसार काँग्रेस उपाध्यक्ष राहुल गांधी यांच्यावर अप्रत्यक्षरित्या निशाणा साधणे मर्यादेचे उल्लंघन केल्यासारखे आहे. भाजपच्या प्रचार साहित्याचे परिक्षण केल्यानंतर ‘पप्पू’ या शब्दाचा अपमानजनक वापर

करण्यात येत असल्याची बाब समोर आली आहे. दरम्यान निवडणूक आयोगाच्या या निर्णयावर भाजपने नाराजी दर्शविली आहे.आमच्या प्रचार साहित्यात कोणा एका व्यक्तीचे नाव घेण्यात आलेले नाही. त्यामुळे आयोगाचा हा आदेश योग्य नसल्याचे भाजपने म्हटले आहे. गुजरातमध्ये १८२ विधानसभेच्या जागांसाठी ९ आणि १४ डिसेंबरला मतदान होणार असून या निवडणूकांचा निकाल १८ डिसेंबरला लागणार आहे.