उत्तरप्रदेशमध्ये पोटनिवडणुकीत भाजपची प्रतिष्ठा पणाला

उत्तर प्रदेश | बहुचर्चित गोरखपूर आणि फुलपूर लोकसभेच्या पोटनिवडणुकीचा आज निकाल जाहीर होत आहे. भारतीय जनता पक्षाचा विजयरथ या दोन्ही मतदारसंघात रोखण्यासाठी तब्बल 25 वर्षानंतर बहुजन समाज पक्ष आणि समाजवादी पक्ष एकत्र आले होते.

11 मार्च रोजी येथे मतदान झाले आणि बुधवारी सकाळी 8 वाजतापासून मतमोजणीला सुरुवात झाली आहे. त्यासोबतच बिहारमधील अररिया येथेही लोकसभेची पोटनिवडणूक झाली. हा मतदारसंघ लालू यादव यांच्या राष्ट्रीय जनता दलाच्या (आरजेडी) ताब्यात होता.

गोरखपूर येथे भाजपने केंद्रीय मंत्री शिवप्रताप शुक्ला यांचे निकटवर्तीय उपेंद्र दत्त शुक्ला यांना तिकीट दिले होते. तर सपा-बसपा आघाडीने निषाद पार्टीचे अध्यक्ष संजय निषाद यांचे चिरंजीव प्रवीण निषाद यांना रिंगणात उतरवले होते. काँग्रेसच्यावतीने सुरहिता करीम यांना उमेदवारी देण्यात आली होती.

फुलपूरमधून भाजपने वाराणसीचे माजी महापौर कौशलेंद्र सिंह पटेल यांना तिकीट दिले होते. त्यांना समाजवादी पक्षाचे मंडल अध्यक्ष नागेंद्र सिंह पटेल यांनी आव्हान दिले होते. याशिवाय फुलपूरमधून अतिक अहमद हे अपक्ष उमेदवार आहेत. ते फुलपूरमधून सपाचे खासदार होते. यावेळी त्यांनी तुरुंगातून निवडणूक लढवली.