नवी दिल्ली | काहीच दिवसांपूर्वी भारत-अमेरिकेचा रायफल्स खरेदी कराराच्या प्रस्तावाला संरक्षण मंत्रालयाकडून मंजुरी देण्यात आली. आता भारत-रशियासोबत ७ लाख ४७ हजार कलाश्निकोव रायफल्स करार करण्याचा निर्णय केंद्राकडून बुधवारी (१३ फेब्रुवारी) घेण्यात आला आहे. उत्तर प्रदेशातील अमेठी येथे या करारांतर्गत कारखाना उभारण्यात येणार आहे. या दोन्ही देशांमध्ये या करारावर येत्या १० दिवसांच्या आत स्वाक्षऱ्या होण्याची शक्यता आहे. विशेष बाब म्हणजे या रायफल्सची निर्मिती ‘मेक इन इंडिया कार्यक्रमां’तर्गत भारतातच करण्यात येणार आहे.
भारत-रशिया रायफल्स करारांतर्गत, रशियाची कलाश्निकोव कंसर्न आणि भारताची ऑर्डिंनन्स फॅक्टरी बोर्ड मिळून एके-४७ च्या तिसऱ्या पिढीमधील एके-२०३ रायफल विकसित करणार आहेत. भारत सरकारच्या धोरणानुसार कारखान्याचे ५०.५ टक्के शेअर्स ऑर्डिन्स फॅक्टरीकडे तर रशियाकडे ४९.५ टक्के शेअर्स असतील. तर भारत-अमेरिका रायफल्स खरेदी करारात भारत अमेरिकेकडून ७३ हजार असॉल्ट रायफल्स खरेदी करणार आहे. या अमेरिकन बनावटीच्या रायफल्स खरेदीसाठी भारताला ७०० कोटी रुपये इतका खर्च येणार असून भारत-चीन सीमेवर तैनात असणाऱ्या जवानांना या रायफल्स देण्यात येणार आहेत.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
