नवी दिल्ली | परदेशातून किती काळा पैसा भारतात आला याची माहिती देण्यास पंतप्रधान कार्यालयाने नकार दिला आहे. केंद्रीय माहिती आयोगाने (सीआयसी) १५ दिवसांमध्ये भारतामध्ये किती काळा पैसा परत आणला याची माहिती देण्याचे स्पष्ट आदेश देऊनही पंतप्रधान कार्यालयाने नकार देत आदेश धुडकावून लावला आहे. भारतीय वन सेवेतील अधिकारी संजीव चतुर्वेदी यांनी जून २०१४ पासून किती काळा पैसा भारतात आला?, असा सवाल केला होता.
पीएमओने गेल्या वर्षी ही माहिती पारदर्शक कायद्यान्वये कलम २ (एफ) अंतर्गत येत नसल्याचे सांगत माहिती देण्यास नकार दिला होता. त्यानंतर चतुर्वेदी यांनी सीआयसीकडे दाद मागितली होती. सीआयसीने त्यांची गंभीर दखल घेत १५ दिवसांत माहिती देण्यास सांगितले होते. तसेच काळ्या पैशांसंदर्भात तपास करण्यासाठी एसआयटी नेमण्यात आली आहे. ही माहिती दिल्यास हा तपास बाधीत होऊ शकतो, असं पीएमओनं आपल्या उत्तरात म्हटलं आहे. चतुर्वेदी यांनी भ्रष्ट मंत्र्यांविरोधात काय कारवाई करण्यात आली याबाबत पीएमओला विचारणा केली होती, पण ही माहितीसुद्धा देण्यास पीएमओने नकार दिला होता.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
