दलितांवर खुनी हल्ला करणाऱ्यांना फाशीची शिक्षा करा

मुंबई | गुजरातच्या राजकोट येथे काचपत्रा वेचणाऱ्या दलित तरुणाची चोरीच्या संशयावरून हत्या करण्यात आली. या अमानुषतेचा आपण रिपब्लिकन पक्षातर्फे तीव्र निषेध करीत असून दलितांवर खुनी हल्ला करणाऱ्यांना फासावर लटकवावे असे मत रिपाइं चे राष्ट्रीय अध्यक्ष केंद्रीय सामाजिक न्याय राज्यमंत्री रामदास आठवले यांनी व्यक्त केले आहे. ते ठाण्यातील श्रीनगर च्या वारलीपाड्यात रिपाइंच्या वतीने महामानव डॉ बाबासाहेब आंबेडकर आणि छत्रपती शिवाजी महाराज यांच्या संयुक्त जयंती सोहळ्यात बोलत होते.

यावेळी रिपाइं चे ठाणे जिल्हा अध्यक्ष रामभाऊ तायडे; डी एम चव्हाण; भास्कर वाघमारे; साहेबराव सुरवाडे ; आबासाहेब चासकर ; मानीषाताई करलाद सचीन भतंब्रेकर; हेमंत रणपिसे गणेश शरणागत ; ऍड. नितीन सरोदे; सुरेश मोरे; कृष्णा कोळे; राजेश मोरे; राजेश सोनवणे ; विक्रम पोटभरे; किशोर आठवले आदी अनेक मान्यवर उपस्थित होते.

राजकोट येथील मुकेश वनिया या 30 वर्षांच्या दलित तरुणाची अमानुष मारहाण करून करण्यात आलेली हत्या हा मानवतेला कलंक फासणारा प्रकार आहे . या गुन्ह्यातील मारेकऱ्यांना फाशीची शिक्षा झाली पाहिजे. ही घटना घडल्याची महिती मिळताच याप्रकरणी राजकोट च्या पोलीस अधिकाऱ्यांशी आपण त्वरित संपर्क साधून आरोपिंना अटक करून कठोर शिक्षा करण्याची मागणी केली. या प्रकरणी गुजरातच्या मुख्यमंत्र्यांची आपण भेट घेणार असून दलितांवर खुनी हल्ला करणाऱ्यांना फाशीचीच शिक्षा करावी अशी मागणी करणार असल्याचे यावेळी रामदास आठवले म्हणाले.

रिपब्लिकन पक्षाचे येत्या दि 27 मे रोजी पुण्यातील आर टी ओ जवळील ;एस एस पी एम एस मैदानात राज्यस्तरीय अधिवेशन आयोजित करण्यात आले आहे. या भव्य अधिवेशनास ठाणे जिल्हा रिपाइं च्या वतीने मोठ्या संख्येने उपस्थित राहण्याचे आवाहन ना रामदास आठवलेंनी यावेळी केले. महामानव डॉ बाबासाहेब आंबेडकरांनी देशाला दिलेले संविधान शक्तिशाली आणि सर्वश्रेष्ठ आहे. त्यांनी दिलेली लोकशाही श्रेष्ठ आहे. कर्नाटकात जे राजकीय युद्ध घडले त्यात कोणत्याही पक्षाचा विजय झाला नसून विजय झाला आहे तर तो केवळ या देशातील लोकशाही चा विजय झाला आहे असे प्रतिपादन रामदास आठवलेंनी केले.