मुंबई | गेल्या १५ दिवसांपूर्वीच ओला उबर टॅक्सीचालकांनी तब्बल १२ दिवस संप पुकारला होता. ज्यामध्ये मुंबईसह संपुर्ण महाराष्ट्रातील ओला उबर टॅक्सीचालक सहभागी झाले होते. त्यावेळी परिवहन मंत्री दिवाकर रावते यांच्याशी चर्चा होऊनही कोणतेही ठोस निर्णय न झाल्याने टॅक्सीचालक-मालकांनी येत्या १७ नोव्हेंबरपासून पुन्हा एकदा संपाची घोषणा केली आहे.

‘सरकारी पातळीवरील चर्चा होउनही आमच्या कोणत्याही मागण्या पूर्ण न झाल्याने, तसेच दोन ते तीन वेळा मीटींग घेऊन आश्वासन देउनही ओला, उबर कंपन्यांकडून कुठलेही आश्वासन पाळण्यात आले नाही. त्यामुळे आमच्यावर पुन्हा संप करण्याची वेळ आली आहे. यामध्ये १७ नोव्हेंबरपासून संप पुकारण्यात येईल तर १९ नोव्हेंबरला मंत्रालयावर मोर्चा काढणार आहोत, असे मराठी कामगार सेनेचे अध्यक्ष महेश जाधव यांनी सांगितले.

मुंबईसह संपुर्ण महाराष्ट्रात हा संप पुकारण्यार येणार आहे. तब्बल ६० हजार गाड्यांचे चालक मालक या संपात सहभागी होतील. ‘कॅब चालकांना चांगला परतावा मिळावा, ऑनलाईन कॅबचं किमान भाडं १०० ते १५० रुपये असावं, प्रति किलोमीटर १८ ते २३ रुपये भाडं लावावं’, अशा मागण्या ओला-उबर चालकांनी केल्या आहेत.