विधानसभा निवडणुकीच्या निकालावर पावसाचे संकट

मुंबई। पावसाळा संपला असला तरी राज्यात मुसळधार पावसाचा धुमाकूळ सुरू असून अवकाळी पावसामुळे शेतीचे नुकसान होत आहे. यामुळे जनजीवन विस्कळीत झाले असून पुढील आणखी ४ दिवस पावसाची शक्यता हवामान खात्याने वर्तवली आहे. तर उद्या (२४ऑक्टोबर ) मतमोजणी होणार आहे. मतमोजणीवर पावसाचे सावट दिसत आहे. यामुळे आता सर्वांच उमेदवारांना पावसाची चिंता वाटू लागली आहे.

भारतीय हवामान शास्त्र विभागाकडून मिळालेल्या माहितीनुसार, गेल्या २४ तासांत कोकण, गोव्यात काही ठिकाणी मुसळधार तर तुरळक ठिकाणी जोरदार पावसाची नोंद झाली. मध्य महाराष्ट्र, मराठवाड्यात तुरळक ठिकाणी मुसळधार पावसाची नोंद झाली. कोकण, गोवा, मराठवाड्यात बहुतांश ठिकाणी, मध्य महाराष्ट्रात अनेक ठिकाणी, विदर्भात काही ठिकाणी पावसाची नोंद झाली.

कोकण किनारी सोसाट्याचा वारा वाहील. २५ ऑक्टोबर रोजी कोकण, गोव्यात तुरळक ठिकाणी जोरदार पाऊस पडेल. विदर्भात तुरळक ठिकाणी मेघगर्जनेसह पाऊस पडणार आहे. २६ ऑक्टोबर रोजी गोव्यात तुरळक ठिकाणी मुसळधार पाऊस पडेल. स्कायमेटच्या अंदाजानुसार कर्नाटकच्या किनारपट्टीवर आणखी एक हवामान प्रणाली विकसित होण्याची शक्यता आहे. यामुळे दक्षिण कोकण आणि गोवा, विदर्भातील काही भाग आणि दक्षिण मराठवाड्यात २७ ऑक्टबरच्या सुमारास पावसात वाढ होईल.