मुंबई | मराठा समाजाच्या आरक्षणाला आव्हान देणाऱ्या अॅड. गुणरत्न सदावर्ते यांच्या याचिकेवर आज (१० डिसेंबर) मुंबई उच्च न्यायालयात सुनावणी होणार आहे. सरकारने ५० टक्क्यांपेक्षा जास्त आरक्षण देणे हे घटनाबाह्य आहे, असे म्हणत अॅड. गुणरत्न सदावर्ते यांनी ३ डिसेंबरला मराठा समाजाच्या आरक्षणाविरोधात मुंबई उच्च न्यायालयात याचिका दाखल केली होती. दरम्यान, मराठा आरक्षणाला स्थगिती देण्यास तूर्तास नकार देत सोमवारी (१० डिसेंबर) अॅड. गुणरत्न सदावर्ते यांच्या याचिकेसह यासंदर्भातील अन्य याचिका देखील निकाली काढण्यात येतील, असे मुंबई उच्च न्यायालयाकडून ५ डिसेंबरला सांगण्यात आले होते.

या सर्व याचिकांवरील सुनावणी मुख्य न्यायाधीशांच्या खंडपीठासमोर होणार आहे. यावेळी अॅड. हरीश साळवे हे मराठा आरक्षणाची बाजू मांडतील. दरम्यान, राज्यात मराठा समाजाच्या आरक्षणासाठीची संवैधानिक आणि प्रशासकीय प्रक्रिया पूर्ण झाली होऊन १ डिसेंबर २०१८ पासून मराठा समाजाच्या आरक्षणाचा कायदा संपूर्ण राज्यभरात लागू करण्यात आला. परंतु कोणत्याही संस्था, संघटनेकडून न्यायालयात या आरक्षणाविरोधात आव्हान याचिका दाखल केली जाऊ शकते, ही शक्यता लक्षात घेऊन राज्य सरकारने सोमवारी (३ डिसेंबर) सर्वोच्च न्यायालयात कॅव्हेट दाखल केले होते. त्यानंतरच, अॅड. गुणरत्न सदावर्ते यांनी मराठा समाजाच्या आरक्षणाविरोधात मुंबई उच्च न्यायालयात याचिका दाखल केली होती.