श्रीनगर | पाकिस्तानमधून जम्मू-काश्मीरमध्ये २० दहशतवाद्यांनी घुसखोरी केली असून भारतीय लष्कराचे कॅम्प आणि राजधानी दिल्लीवर मोठा हल्ला होण्याची शक्यता असल्याची माहिती गुप्तचर संघटना मिळाली आहे. त्यामुळे संपूर्ण राज्यात हाय अ‍ॅलर्ट जारी करण्यात आला आहे.

काश्मीरमधील लष्कराच्या विविध ठिकाणांवर येत्या काही दिवसांत आत्मघाती हल्ले होऊ शकतात. पठाणकोट व सुंझवान हल्ल्यांप्रमाणे यावेळी काही घडू नये, याची दक्षता घेण्यात येत आहे. त्यासाठी गस्ती पथके, पोलीस, सुरक्षा दलांच्या चौक्या, लष्कराची ठिकाणे या ठिकाणी कडक बंदोबस्त ठेवला आहे.

तसेच राजधानी दिल्लीतील गर्दीच्या ठिकाणी दहशतवादी हल्ला होण्याची शक्यता वर्तविली जात आहे. दहशवाद्यांच्या निशाण्यावर दिल्लीचे इंदिरा गांधी इंटरनॅशनल एअरपोर्ट, बस स्थानके, रेल्वे स्टेशन आणि दिल्लीतील काही मॉल्स असल्याची माहिती गुप्तचर संघटनांना मिळाली आहे. त्यामुळे राज्यातील गर्दीच्या ठिकाणी हाय अ‍ॅलर्ट जारी करण्यात आला आहे.

पाकमधून घुसखोरी करणारे दहशतवादी जैश-ए-मोहम्मद व लष्कर-ए-तोयबा दोन्ही संघटनांपैकी नक्की कोणत्या संघटनांचा हात असण्याची माहिती अद्याप गुप्तचर संघटनांना मिळाली नाही.