मुंबई । दहीकाला उत्सवादरम्यान भाजप आमदार आणि प्रवक्ते राम कदम यांनी स्रियांविषयी केले बेताल वक्तव्य त्यांना भोवणार असल्याची चिन्हे दिसत आहेत. राम कदम हे भाजपचे प्रवक्ते म्हणून अनेक वृत्तवाहिन्यांच्या कार्यक्रमाला उपस्थिती दर्शवितात. परंतु त्यांच्या वादग्रस्त वक्तव्यानंतर भाजपकडून आता त्यांचे प्रवक्तेपद काढून घेण्यात येणार असल्याची माहिती मिळत आहे.

राम कदम यांच्या वादग्रस्त विधानामुळे त्यांच्यावर सर्वच स्तरातून मोठ्या प्रमाणात टीका झाली, त्यांचा तीव्र निषेधही व्यक्त केला गेला. तसेच त्यांनी या प्रकाराबद्दल माफी मागितली असली तरी त्यांनी त्यांची चूक कबूल न केल्यामुळे देखील त्यांच्यावर टीका झाली. आता भाजपने देखील राम कदम यांना कोणत्याही वृत्तवाहिनीमध्ये प्रवक्ते म्हणून जाऊ नये, अशी सूचना केली आहे.