मराठा आरक्षणावर ८ ऑगस्टला राहुल गांधी यांची बैठक 

मुंबई । महाराष्ट्रात सध्या मराठा आरक्षण मुद्दा तापलेला असतांना या विषयात आता काँग्रेस पार्टीचे अध्यक्ष राहुल गांधी यांनी मराठा आरक्षणावर सध्या राज्यभरात आंदोलनं सुरु असून या विषयाचं गांभीर्य लक्षात घेत बैठक बोलावली आहे. राहुल गांधी यांनी मराठा आरक्षणावर चर्चा करण्यासाठी राज्यातील महत्त्वाच्या नेत्यांची बैठक बोलावली आहे. ८ ऑगस्टला ही बैठक पार पडणार असून यावेळी राहुल गांधी नेत्यांशी चर्चा करणार आहेत.

सरकारकडून ७ ऑगस्टपर्यंत समाजाच्या सर्व मागण्यांवर विचार व्हावा अन्यथा राज्यभर ठिय्या आंदोलन केले जाईल, असा इशारा सकल मराठा मोर्चाकडून राज्य सरकारला देण्यात आला आहे. सकल मराठा मोर्चाला परळीतून सुरुवात झाली त्यामुळे समाजाच्या आरक्षणासंदर्भात सरकारने परळीत येऊनच चर्चा करावी. आमचे कोणतेही समन्वयक सरकारशी चर्चेसाठी जाणार नाहीत अशी भूमिका घेण्यात आली आहे.

दुसरीकडे मुंबई उच्च न्यायालयाने मराठा आरक्षणासंदर्भातील सुनावणी १४ ऐवजी ७ ऑगस्टला घेण्याचा निर्णय घेण्यात आला आहे. उच्च न्यायालयात लवकरात लवकर सुनावणी घ्यावी अशी विनंती करण्यात आली होती. यानंतर न्यायाधीश रणजीत मोरे आणि अनुजा प्रभू-देसाई यांच्या खंडपीठाने सुनावणी १४ ऑगस्टऐवजी ७ ऑगस्टला घेण्याचा निर्णय घेतला आहे.