मराठा आरक्षण कुठे अडलंय | खासदार उदयनराजे भोसले

पुणे | मराठा आरक्षणाला पाठींबा देत आज खासदार उदयनराजे भोसले यांनी सरकारवर जोरदार टीका केली. मराठा आरक्षणाला कोणाचाही विरोध नाही, तर मग इतकी वर्ष हा प्रश्न का सुटला नाही? ५८ मूक मोर्चे निघाले पण तरीही मराठा आरक्षण लांबवलं. त्याचवेळी तातडीने पावलं उचलली असती, तर आज अनेकांचे जीव गेले नसते, असं राष्ट्रवादी काँग्रेसचे साताऱ्याचे खासदार उदयनराजे भोसले म्हणाले.

पुण्यात घेतलेल्या पत्रकार परिषदेत ते बोलत होते. दुसऱ्या कोणत्या समाजाचं आरक्षण काढून घ्या असं आम्ही म्हणत नाही. मात्र मराठा, धनगर समाजातील जनतेलाही न्याय मिळावा, असं उदयनराजे म्हणाले. सर्व राजकर्ते म्हणतात आरक्षणाबाबत आम्हाला काहीच हरकत नाही मग आरक्षणापासून वंचित समाजाला आरक्षण का मिळत नाही? असा सणसणीत प्रश्न विचारात सरकारची इच्छाशक्ती नाही किंवा राजकारणाशिवाय इथे दुसरा मुद्दा असूच शकत नाही, असे बोलून त्यांनी सरकारवर टोला लगावला. यावेळी ‘आंदोलकांवरील खटले मागे घ्या नाहीतर भडका होईल’, असा सज्जड इशारा त्यांनी दिला. मागील कित्येक वर्षांपासून मराठा आरक्षणासाठी आंदोलनं सुरू आहेत. मग लोकांचे जीव जाण्याची वाट सरकार पाहत होतं का? अद्याप मराठा, मुस्लिमांना आरक्षण का मिळाले नाही, असे म्हणत कुटुंबातील एका व्यक्तीने आत्महत्या करून मग कुटुंबियांना पैशांची मदत आणि नोकरी देण्यात काय अर्थ आहे.

मागेच हा प्रश्न मार्गी लावला असता तर आज आरक्षणासाठी जीव गमावण्याची वेळ आली नसती, असे त्यांनी सांगितले. अनेकांना वाटतं आंदोलकांना कोणीही प्रवृत्त केलेलं नाही, परिस्थितीच अशी आहे की, इतर पर्याय नाही त्यामुळे आता आश्वासनं देऊन काहीही होणार नाही. लोकांच्या भावना समजून घेतल्या पाहिजे. प्रत्येक लोकप्रतिनिधीने यासाठी पुढाकार घ्यावा, लोकप्रतिनिधींनी विसरू नये की, हिच सामान्य माणसं आपल्याला निवडून देतात. जर घटना लिहिणारे माणूस होते तर घटनेत दुरुस्तीही माणसंच करतात मग या मुद्द्याकडे दुर्लक्ष का? असे म्हणत सरकारने हा मुद्दा किती लांबणीवर टाकणार हे सांगावे आणि आरक्षणापासून वंचित समाजाला लवकर आरक्षण मिळवून द्यावं असं ते म्हणाले.