धनंजय दळवी | राज्यात गेल्या आठ दिवसांपासून मराठा आरक्षणासाठी मोठ्या प्रमाणात आंदोलनाला सुरुवात झाली आहे. परंतु सरकार मराठा आरक्षणावर ठोस निर्णय घेत नसल्यामुळे संतप्त मराठा आंदोलकांनी आज जेल भरो आंदोलनाची हाक दिली होती. दुपारी कार्यकर्त्यांना पोलिसांनी अटक केल्यानंतर कारवाईकरून कार्यकर्त्यांना सोडण्यात आले. तसेच जेल भरो आंदोलनाला पूर्ण विराम लावला. राज्यभर सकल मराठा समाजाने आंदोलनाचा इशारा दिला होता. मुंबईत आज मराठा समाजाच्या प्रतिनिधींनी आझाद मैदानात येऊन धरणे आंदोलन केले. यावेळी आंदोलकांनी जोरदार घोषणाबाजी केली.
अंदाजापेक्षा कमी आंदोलक आल्याने पोलीस बंदोबस्त ऐनवेळी कमी करण्यात आला. काल रात्री कुणीतरी खोडसाळपणे आंदोलन रद्द केल्याचा संदेश फिरविण्यात आल्याने उपस्थिती कमी असल्याचे आंदोलकांनी सांगितले. गेल्या आठवड्याभरात राज्यभर मराठा समाजाची हिंसक आंदोलने झाली. गाड्यांची तोडफोड, जाळपोळ झाल्याने आजच्या मुंबईतील आझाद मैदानाच्या जेल भरो आंदोलनाकडे सर्वांचे लक्ष लागले होते. सकाळी आझाद मैदानात रॅपिड अ‍ॅक्शन पथकापाासून मोठ्या प्रमाणात पोलीस बंदोबस्त तैनात करण्यात आला होता. परंतु दुपारपर्यंत जेमतेम कार्यकर्तेच आंदोलनात सहभागी झाले. आम्ही कमी असलो तरी भारी आहोत. ‘एक मराठा-लाख मराठा’ ही आमच्या आंदोलनाची घोषणाच आहे, असे आंदोलक केदार सूर्यवंशी यांनी सांगितले.
‘नागपूरचा पोपट काय म्हणतो, मराठ्यांना आरक्षण नाय म्हणतो, आमच्या मागण्या पूर्ण करा, नाहीतर खुर्च्या खाली करा, कोण म्हणतो देणार नाय, घेतल्याशिवाय राहणार नाय, या सरकारचे करायचे काय, खाली डोके वर पाय, आदी जोरदार घोषणा देण्यात आल्या. मुख्यमंत्री देवेंद्र फडणवीस, सार्वजनिक बांधकाममंत्री चंद्रकांत पाटील आणि आमदार राम कदम यांच्या उलटसुलट वक्तव्यामुळेच शांततेत निघणार्‍या मराठा समाजाचे आंदोलक हिंसक झाल्याचा आरोप करीत त्यांच्या विरोधात घोषणा देण्यात आल्या.
मुख्यमंत्री यांनी खोटी चर्चा, राज्यपालांनी भेट नाकारली
मुख्यमंत्री यांनी खोटी चर्चा घडवून आणण्यामागे मराठा आंदोलनात फूट पाडण्याचा डाव आहे. यावरुन त्यांना राज्यात अराजकता ठेवण्यात जास्त रस आहे, असा आरोप सकल मराठा समाजाने केला आहे. तसेच मराठा समाजाच्या वतीने चालू असलेल्या आंदोलनाची राज्यपालांना भेटण्याची मागणी राज्यपालांनी फेटाळली. तसेच डीसिपी अभिषेक त्रिमुके यांनी राज्यपालांशी चर्चा करून संबंधित कार्यकर्त्यांवर गुन्हा दाखल केला.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
