करमाळा | भाकड जनावरे सांभाळण्यासाठी अनुदान गोशाळेस न देता शेतकऱ्यांच्या खात्यावर जमा करावे यांसह शेतकऱ्यांच्या अनेक मागण्यासाठी प्रहार शेतकरी संघटनेने करमाळा तहसील कार्यालयावर वाजतगाजत भाकड जनावरांचा मोर्चा काढला. यावेळी मोर्चामध्ये मोठया प्रमाणावर शेतकरी सामील झालेले पहायला मिळाले.
आजचा शेतकरी अनेक संकटाचा सामना करतोय शेतात पिकलेल्या मालाला भाव नाही तर दुसरीकडे दुधाला कमी दर यामुळे बळीराजा चांगलाच अडचणीत सापडला आहे. दुधाला ३५ रु लिटर दर मिळावा व भाकड जनांवराचे अनुदान शेतकऱ्यांना मिळावे या मागणीसाठी आज करमाळा तहसील कार्यालयावर मोर्चा काढण्यात आला होता. मुक्या जनावरांच्या तोंडातला घास काढून तो गो-संवर्धन करणार्‍या लबाड संस्था चालकांच्या घशामध्ये घालण्याचा घाट भाजपा सरकारच्या सरकारने घातला आहे.
गो-हत्या बंदी कायदा करून गो-शाळांना मान्यता देवून या शाळांमध्ये शेतकर्‍यांनी आपली भाकड जनावरे दाखल करून थेट शेतकर्‍यांना अनुदान न देता गो-शाळा चालकांना अनुदान देण्याचे काम केले आहे. भाजपा सरकारने जनावरांच्या नावाखाली गो-शाळा चालकांना आयते कुरण उपलब्ध करून दिले. त्यामध्ये प्रत्येक वर्षाला गो-शाळा संस्था चालकांना राज्यामध्ये रुपये ३४ कोटी अनुदान देण्याचे काम हे सरकार करते. म्हणजे प्रत्यक्षात शेतकरीही उपाशी व त्यांच्याकडील भाकड जनावरेही उपाशी ठेवण्याचे काम हे सरकार करत असल्याचा आरोप प्रहार संघटनेचे पश्चिम महाराष्ट्र प्रमुख अतुल खूपसे यांनी यावेळी माध्यमांशी बोलताना केला .
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
