वंचित घटकांना मुख्य प्रवाहात आणण्यासाठी शासकीय यंत्रणांनी प्रयत्नशील – जिल्हाधिकारी डोंगरे 

उत्तम बाबळे

नांदेड :- समाजातील वंचित घटकांना विविध योजनांचा लाभ देवून त्यांना विकासाच्या मुख्य प्रवाहात आणण्यासाठी शासकीय यंत्रणानी अधिक प्रयत्नशील राहावे , असे निर्देश जिल्हाधिकारी अरुण डोंगरे यांनी दिले.

नांदेड जिल्हाधिकारी कार्यालयातील निजी कक्षात “वंचित घटकांना दिलासा” या संदर्भात आयोजित बैठकीत डोंगरे हे अध्यक्षपदावरुन बोलत होते. यावेळी जिल्हा ग्रामीण विकास यंत्रणेचे सहाय्यक प्रकल्प संचालक डॉ. पी. पी. घुले, के. बी. दिक्षीत, जी. बी. सुपेकर, जिल्हा पुरवठा अधिकारी संतोष वेणीकर, जिल्हा अग्रणी बँक व्यवस्थापक विजय उशीर, समाज कल्याण अधिकारी सत्येंद्र आऊलवार, सहाय्यक पुरवठा अधिकारी सौ. संतोषी देवकुळे, पंचायत समितीचे विस्तार अधिकारी डी. एच. देशपांडे, नायब तहसिलदार विजय चव्हाण आदि अधिकारी उपस्थित होते.

यावेळी जिल्हाधिकारी डोंगरे म्हणाले की, समाजातील वंचित घटकांपर्यंत पोहचण्याचा जिल्हा प्रशासनाचा प्रयत्न आहे. अशा घटकांना शोधून त्यांना त्यांचे हक्क प्रदान करणे ही बाब महत्वपुर्ण आहे. शासनाच्या विविध योजनांचा लाभ त्यांना देण्यासाठी संबंधीत अधिकाऱ्यांनी नियोजन करावे. जिल्ह्यात ज्या भागात वंचित घटकांची संख्या अधीक आहे असे भाग निश्चित करुन त्याठिकाणी प्राधान्य दयावे.

जिल्ह्यात कुठलाही घटक विकासापासून वंचित राहू नये यासाठी प्रयत्न केले जाणार आहेत. वंचित कुटुंबाचा शोध घेवून त्यांच्या पुनर्वसनाबरोबर आरोग्य, शिक्षण, निवारा, अन्न-धान्य, शिधापत्रिका, व्यवसायासाठी अर्थसहाय्य या सारख्या सुविधा उपलब्ध करुन दिल्या जातील. सर्व शासकीय अधिकाऱ्यांनी त्यांना विविध योजनाचा एकत्रित लाभ देण्यासाठी नियोजन करुन त्याची प्रभावी अंमलबजावणी करावी, असेही डोंगरे यांनी सांगितले. यावेळी अाऊलवार यांनी समाज कल्याण विभागाची यशवंतराव चव्हाण मुक्त वसाहत योजनेच्या माध्यमातूनही वंचित घटकांना लाभ देता येईल, असे सांगितले. प्रारंभी जिल्हा पुरवठा अधिकारी संतोष वेणीकर यांनी जिल्ह्यातील वंचित घटकांचा शोध घेतला असता ६६८ कुटुंब संख्या असल्याची माहिती उपलब्ध झाली आहे. त्याची तालुकानिहाय यादी तयार करुन संबंधीत अधिकारी यांनी दिलेली आहे. या घटकांना लाभ देण्याच्या दृष्टिने नियोजनही करण्यात येत आहे, असे सांगितले.