मुंबई | मुंबईमध्ये गेल्या तीन महिन्यापासून ‘खीळे मुक्त झाड’ ही मोहीम राबवली जात आहे. झाडांना खिळे मुक्त करण्यासाठी पुण्याच्या आंगोळीची गोळी या संस्थेने प्रामुख्याने पुढाकार घेतल्याचे पहायला मिळत आहे. आंगोळीची गोळी ही संस्था गेल्या ४ वर्षापासून प्रेम, बंधुभाव, त्याग, बचत या चार तत्वांवर आधारीत पाणी बचतयांसह अनेक सामाजिक उपक्रम राबवत आले. खिळेमुक्त झाडे हि मोहीम पुण्यात गेल्या तीन महिन्यांपासून सुरु असून मुंबईत या मोहिमेला १ एप्रिल पासून प्रारंभ झाला आहे.

या मोहिमेला मुंबईत अविनाश पाटील, सागर वाळके या दोन तरुणांनी सुरुवात केली आहे. या मोहीमेत एमएसडब्लू, बीएसडब्लू चे विद्यार्थी सहभागी झालेले आहेत. दादर, कल्याण आणि डोंबिवली या ठिकाणी हि खिळे मुक्त झाड मोहीम राबविल्यानंतर ३ जून ला ही मोहिम विरार येथे राबविण्यात येणार आहे. या मोहिमेदरम्यान या विद्यार्थ्यांना झाडांना खीळे, लोखंडी गज , स्क्रु ड्राइव्हर आणि लोखंडी पाण्याचे पाइप अशा विविध वस्तू झाडात आढळून आल्या आहेत . आता पर्यंत या मोहिमेत तरुणांनी १५० हून अधिक झाडे खिळेमुक्त केली आहेत. या झाडांना पडलेले खड्डे बुजविण्यासाठी मेनबत्ती वॅक्सचा वापर करण्यात येत आहे. यामुळे झाडांना कोणत्याही प्रकारची इजा होणार नाही तसेच किड लागणार नाही याची काळजी घेण्यात आली आहे.

१९७० मध्ये मुंबईत ३५ टक्के झाडे होती त्या तुलनेत मुंबईत सध्या १३ टक्क्यांहून कमी झाडे असल्याचे इनडीयन इंस्टिट्यूट ऑफ सायन्सच्या रीसर्च मधून समोर आले आहे. परंतु सध्या लोकसंख्येच्या तुलनेत ३३ टक्के झाडे शिल्लक राहिली आहेत. मात्र हे प्रमाण मुंबईत अतिअल्प असून ४ व्यक्तींच्या मागे १ झाड अशी सध्या अवस्था आहे. मुंबईमध्ये या मोहिमेत अनेक संस्था एकत्र येऊन सध्या काम करत आहेत. स्वच्छ भारत अभियानाला अनुसरुन ही मोहीम राबविण्यात येत आहे. अंबरनाथमध्ये देखील हि मोहिम घेण्यात आली आहे. तसेच यापुढे देखील मोहीम मुंबई शहरात विविध सामाजिक संस्थांना एकत्र घेऊन करण्यात येईल अशी माहिती आंगोळीची गोळी संस्थेचे सदस्य तुषार वारंग यांनी दिली.