उत्तम बाबळे
नांदेड :- शास्त्रीय कला क्षेत्रात प्राविण्य मिळविणाऱ्या व लोक कला प्रकारात सहभागी होणाऱ्या दहावीच्या विद्यार्थ्यांना सवलतीचे २५ वाढीव गुण देण्याचा राज्य माध्यमिक व उच्च माध्यमिक शिक्षण मंडळाने निर्णय घेतला आहे.या निर्णयानुसार मार्च २०१७ पासून दहावीच्या परीक्षेमध्ये कला क्षेत्रात प्राविण्य मिळविणाऱ्या व लोककला प्रकारात सहभागी होणाऱ्या विद्यार्थ्यांना वाढीव गुणाची सवलत देण्यासाठी शास्त्रीय संगीत, नृत्य व वादन तसेच लोककला क्षेत्रातील संस्थांचे प्रमाणपत्र देण्यासाठी आता ५ संस्थाना मान्यता देण्यात आली असल्याची माहिती लातूर विभागीय शिक्षण मंडळाचे सचिवांनी दिली आहे. इयत्ता ११ वीच्या प्रवेशपत्रासाठी या शासनमान्य असणाऱ्या पाच संस्थांमधील विद्यार्थ्यांना कला क्षेत्रातील राखीव जागांवर सन २०१६ – १७ या शैक्षणिक वर्षात प्रवेश देण्यात येत होता. या पाच संस्थांचा आता विद्यार्थ्यांना सवलतीच्या वाढीव गुण देण्याकरीता निवड करण्यात आलेल्या संस्थांच्या यादीमध्ये समावेश करण्यात येत आहे. या संस्था पुढीलप्रमाणे अखिल भारतीय गंधर्व महाविद्यालय, सरफोजी राजे भोसले डान्स रिसर्च इन्स्टिटयूट, नालंदा नृत्त्य कला महाविद्यालय, श्री वल्लभ संगितालय आणि पुणे भारत गायन समाज. या वाढीव गुणांकरीता प्रमाण देण्याची कार्यपद्धती १ मार्च २०१७ च्या शासन निर्णयामध्ये नमूद केल्याचे शिक्षण मंडळाने म्हटले आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
