मुंबई | “मी यापूर्वीही महिलांची माफी मागितली आहे. आता पुन्हा महाराष्ट्र राज्य महिला आयोगाच्या माध्यमातून माता – भगिनींची बिनशर्त माफी मागतो. तसेच मी आयोगाला विश्वास देऊ इच्छितो की आई-वडील हे साक्षात परमेश्वर आहेत आणि प्रत्येक स्त्री ही साक्षात लक्ष्मी आहे, हा संदेश रुजविण्यासाठी मी भविष्यात कायम प्रयत्न करीत राहीन,” असे राम कदम यांनी महाराष्ट्र राज्य महिला आयोगाकडे माफी मागत म्हटले आहे.

दरम्यान, भाजप आमदार राम कदम यांच्या या माफीनाम्यावर कायदेशीर सल्ला घेऊन त्यानंतरच योग्य ती कारवाई करण्यात येणार असल्याचे महाराष्ट्र राज्य महिला आयोगाच्या अध्यक्ष श्रीमती विजया रहाटकर यांनी स्पष्ट केले आहे. दहीहंडी उत्सवात स्त्रियांबद्दल केलेल्या वादग्रस्त वक्तव्याबद्दल भाजप आमदार राम कदम यांनी आता महाराष्ट्र राज्य महिला आयोगाकडे माफी मागितली आहे. त्याचप्रमाणे या पुढे देखील महिलांचा सन्मान वाढेल यासाठी ते कायम कार्यरत राहतील, असा विश्वासही त्यांनी यावेळी दिला आहे.

राम कदम यांच्या वादग्रस्त विधानानंतर आयोगाने त्यांना 5 सप्टेंबर रोजी आपले म्हणणे आठ दिवसांत सादर करण्याची सूचना दिली होती. त्यानुसार राम कदम यांनी महाराष्ट्र राज्य महिला आयोगाकडे लेखी खुलासा सादर करून महिलांची माफी मागितली आहे. महिलांविषयक कोणतेही वक्तव्य करताना आमदार कदम यांनी काळजी घ्यायला हवी होती, असे आयोगाच्या अध्यक्ष विजया रहाटकर यांनी म्हटले आहे.