पुणे | भाजप आणि शिवसेनेची ३० वर्षांची युती तुटली आणि २०१९ च्या विधानसभा निवडणुकीनंतर घडलेल्या धक्कादायक राजकीय घडामोडींमुळे देवेंद्र फडणवीसांना ध्यानीमनी नसताना मुख्यमंत्रिपद सोडावे लागले होते. तसेच त्यानंतर अजित पवार यांचा पाठिंबा घेऊन सरकार स्थापन करण्याचा निर्णयही अंगलट आला होता. उद्धव ठाकरेंच्या नेतृत्वाखालील महाविकास आघाडीचे सरकार पडणार असल्याचे दावे भाजप नेत्यांकडून केले जातात.
तसेच त्यासाठी वेगवेगळ्या तारखाही दिल्या जातात मात्र असे असूनही राज्यातील ठाकरे सरकार स्थिर आहे. त्यामुळे भाजपा आणि देवेंद्र फडणवीस हे अजून किती काळ विरोधी पक्षात बसणार हा सवाल विचारला जात आहे. आज (९ जुलै) देवेंद्र फडणवीस हे पुण्याच्या दौऱ्यावर आले असताना प्रसारमाध्यमांनी देवेंद्र फडणवीस यांनी हसत हसत सूचक उत्तर दिले. अजून किती काळ विरोधी पक्षात बसणार? असे विचारले असता देवेंद्र फडणवीस म्हणाले की, जितका काळ विरोधी पक्षात बसायची आज्ञा असेल तितका काळ आम्ही विरोधी पक्षात बसू असे देवेंद्र फडणवीस यांनी सांगितले आहे.
यावेळी प्रितम मुंडे यांना मंत्रिपद न मिळाल्याने पंकजा मुंडे यांची नाराजी आणि भागवत कराड यांना मिळालेले मंत्रिपद याबाबत विचारले असता देवेंद्र फडणवीस म्हणाले की, मी आणि डॉ. भागवत कराड आम्ही दोघेही मुंडे साहेबांनी तयार केलेलं नेतृत्व आहे. याला पद दिल्याने, याला मंत्री केल्याने याला संपवायचंय वगैरे भाजपमध्ये नसतं. भागवत कराड यांना मंत्री केल्याने जेवढा आनंद मला किंवा पक्षातल्या कार्यकर्त्यांना झाला आहे. त्याच्यापेक्षा जास्त आनंद पंकजाताईंना झाला असेल.
कारण भागवत कराड हे मुंडे परिवारातले आहेत, असेही देवेंद्र फडणवीस यांनी सांगितले आहे. तसेच यावेळी संजय राऊत यांच्यावर निशाणा साधण्याची संधीही देवेंद्र फडणवीस यांनी सोडली नाही. संजय राऊत पंडित आहेत असं का वाटतं तुम्हाला?, असं विचारला असता, ते सर्वज्ञ आहेत असं तुम्हाला वाटत असेल, पण तसं काही नाही, असा टोला देवेंद्र फडणवीस यांनी लगावला.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
