“४०% मुंबईकर स्वबळावर कोरोनामुक्त झाले का ?”, आशिष शेलारांची टीका  

मुंबई | देशातील कोरोनाबाधितांचा आकडा दिवसेंदिवस मोठ्या प्रमाणात वाढत आहे. त्यातच सुरुवातीपासून मुंबई हा कोरोनाचा हॉटस्पॉट राहिला आहे. मुंबईतील कोरोनाबाधितांचा सातत्याने वाढणारा आकडा ही निश्चितच अत्यंत गंभीर बाब आहे. दरम्यान, भाजप नेते आशिष शेलार यांनी मुंबईतील या कोरोनास्थितीवरून राज्य सरकारवर आणि मुंबई महानगरपालिकेवर निशाणा साधला आहे. “४०% मुंबईकर स्वबळावर कोरोनामुक्त झाले का ?”, असा सवाल आशिष शेलार यांनी महानगरपालिकेकडे उपस्थित केला आहे. त्याचप्रमाणे, “१ लाख अँटीबॉडी टेस्ट्स करा म्हणजे खरं समोर येईल”, अशी मागणी देखील आशिष शेलार यांनी केली आहे.

नीती आयोग आणि मुंबई पालिकेच्या 3 वाँर्डातील अँटीबॉडी सर्वेक्षणात झोपडपट्टीत 57% तर इमारतीमध्ये 16% जणांना कोरोना होऊन गेल्याचे उघड. तर खाजगी लँबच्या सर्वेत सुमारे 25% लोकांना कोरोना होऊन गेलाय?
म्हणजे 40% मुंबईकर स्वबळावर कोरोनामुक्त झाले?
यात तुम्ही काय करुन दाखवले?
(1/2)

— Adv. Ashish Shelar – ॲड. आशिष शेलार (@ShelarAshish) July 29, 2020

एका सर्व्हेतून समोर आलेल्या माहितीनुसार, “मुंबईतील झोपडपट्टी परिसरात सरासरी साधारणतः ५७% नागरिकांमध्ये अँटीबॉडीज तयार झाल्या आहेत. म्हणजेच या परिसरातील तब्बल ५७% लोकांना याआधीच कोरोना होऊन गेला आहे. तर झोपडपट्टी परिसर वगळता अन्य भागातील सरासरी साधारणतः १६ % नागरिकांमध्ये अँटीबॉडीज तयार झाल्या आहेत.” याच पार्श्वभूमीवर आशिष शेलार यांनी राज्य सरकार आणि मुंबई महानगरपालिकेला धारेवर धरले आहे. “आवश्यकता होती तेव्हा चाचण्या वाढवल्या नाहीत. आता चाचण्या वाढवून कोरोना होऊन गेला सांगता? यात तुम्ही काय करुन दाखवले?”, असा सवाल आशिष शेलार यांनी उपस्थित केला आहे.

झोपडपट्टीत शौचालयांची स्वच्छता नसल्याने…इमारतीमध्ये जंतूनाशक फवारणी बंद केल्याने कोरोना वाढला..चाचण्यांची संख्या जेव्हा आवश्यक होती तेव्हा वाढवली नाही.आता चाचण्या वाढवून कोरोना होऊन गेला सांगताय..?
यात तुम्ही काय करुन दाखवले?
1 लाख अँटीबॉडी चाचण्या करा… सत्य समोर येईल (2/2)

— Adv. Ashish Shelar – ॲड. आशिष शेलार (@ShelarAshish) July 29, 2020