मुंबई | मुंबईत भांडुपमध्ये कोरोना रुग्णालयाला भीषण आग लागली असून ९-१० तासानंतरही आग विझवण्याचे अथक प्रयत्न सुरुच आहेत. कोरोना रुग्ण दाखल असणाऱ्या या रुग्णालयात लागलेल्या आगीत २ जणांचा मृत्यू झाला असून काहीजण अडकल्याची भीती आहे. जवळपास ७० कोरोना रुग्णांची रुग्णालयातून सुटका करण्यात आली आहे. मॉलमध्ये असणाऱ्या रुग्णालयात लागलेल्या आगीनंतर महापौर किशोरी पेडणेकर यांनी ही गंभीर बाब असल्याचं म्हटलं आहे.
भांडुपमध्ये रात्री १२.३० वाजण्याच्या सुमारास ड्रीम्स मॉल सनराइज हॉस्पिटलमध्ये ही आग लागली. मुंबईत एकीकडे करोना रुग्णसंख्या चिंतेचा विषय ठरत असतानाच आग लागल्याची ही घटना घडली. मुंबईच्या महापौर किशोरी पेडणेकरदेखील घटनास्थळी दाखल झाल्या होत्या. “पहिल्यांदाच मी मॉलमध्ये रुग्णालय पाहत आहे. ही अत्यंत गंभीर बाब आहे. ७ रुग्ण व्हेंटिलेटरवर होते. ७० रुग्णांना इतर रुग्णालयात नेण्यात आलं आहे. आगीचं कारण जाणून घेण्यासाठी तपास केला जाईल,” असं किशोरी पेडणेकर यांनी म्हटलं आहे.
भांडूप येथे सनशाईन रुग्णालयाला भीषण आग लागण्याची घटना घडली त्याप्रसंगी घटनास्थळी भेट देऊन आढावा घेतला सोबत अग्निशमन दलाचे अधिकारी व कर्मचारी वृंद@mybmc @AUThackeray pic.twitter.com/UGNxcg3siy
— Kishori Pednekar (@KishoriPednekar) March 25, 2021
दरम्यान, आगीची माहिती मिळाल्यानंतर अग्निशमन दलाच्या २२ गाड्या घटनास्थळी दाखल झाल्या होत्या. आगीचं कारण अद्याप अस्पष्ट असून याप्रकरणी तपास सुरु करण्यात आला आहे. “आगीमध्ये दोघांचा मृत्यू झाला आहे. रात्री १२.३० वाजता रुग्णालयाच्या पहिल्या मजल्यावर आग लागली होती. अग्निशमन दलाच्या २२ ते २३ गाड्या घटनास्थळी उपस्थित आहेत,” अशी माहिती पोलीस अधिकारी प्रशांत कदम यांनी एएनआयला दिली आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
