मुंबई | केंद्रीय वाणिज्य आणि उद्योग खात्याने हापूसच्या आंब्यावर जीआय टॅग लावल्यामुळे आता कोकणचा हापूस सगळीकडे भाव खाणार आहे. कोकण भागात पिकणाऱ्या आंब्याला सरकारने आता जिओग्राफीकल इंडिकेशन (जीआय) टॅग दिल्यामुळे हापूसच्या उत्पादकांना आणि अर्थव्यवस्थेला मोठी चालना मिळणार आहे. गेल्या काही वर्षांपासून कोणता हापूस आंबा हा अस्सल हापूस यावर वाद होता, तो वाद आता मिटला आहे. जीआय टॅग लावल्याने हापूस आंब्याची निर्यात वाढणार आहे. त्यामुळे कोकणातील हापूस आता भरारी घेऊ शकेल.
हापूस आंबे देशात कुठेही पिकवा आणि विका, पण अस्सल हापूस आंबा पाहिजे असेल तर कोकणचाच हापूस अस्सल मानला जाईल असा शिक्कामोर्तब उद्योगमंत्री सुरेश प्रभू यांनी केला आहे. जगात अनेक देशात हापूस आंबा विकला जातो. या आधी तो जपान, कोरिया आणि युरोपमध्येही विकला जात होता. गेल्या काही वर्षांत तो अमेरिका आणि ऑस्ट्रेलियातही जाऊ लागला आहे. पण, आता जीआय टॅगमुळे कोकणचा हापूस अस्सल मानला जाणार आहे.
जीआय टॅग लावण्यात आलेली फळे
एखाद्या उत्पादनाचे भौगोलिकदृष्ट्या मूळ स्थान दर्शविण्यासाठी जीआयचा वापर केला जातो.यापूर्वी दार्जिलिंगचा चहा, महाबळेश्‍वरची स्ट्रॉबेरी,जयपूरची निळ्या रंगाची मातीची भांडी, बनारसी साडी, तिरुपतीचे लाडू, कोकम यासह भारतातील ३२५ उत्पादनांना जीआय टॅग मिळाला आहे आणि आता हापूस आंबा कोकणाचा भौगोलिक संकेत म्हणून ओळखला जाणार आहे.
As an independent media platform, we do not take advertisements from governments and corporate houses. It is you, our readers, who have supported us on our journey to do honest and unbiased journalism. Please contribute, so that we can continue to do the same in future.
